MABESTE AISAMBAZA 'NISHAURI'

Na Elizabeth John

BAADA ya kutamba na nyimbo mbalimbali katika muziki wa kizazi kipya nchini, William Ngowi ‘Mabeste’ yupo mbioni kuachia kibao chake kipya kinachojulikana kwa jina la ‘Nishauri’ ambacho amemshirikisha mkali wa muziki huo, Peter Msechu.

Akizungumza jijini Dar es Salaam leo, Mabeste alisema, ngoma hiyo ipo tayari na kinachosubiriwa kumalizika kwa sikuku za Idd ili aweze kuisambaza kwenye vituo mbalimbali vya radio.

“Mungu akisaidia, naweza kuachia pamoja na video, lakini endapo hali haitokwenda sawa, nitaachia ‘audio’ halafu video itafuata baadaye,” alisema Mabeste.

Msanii huyo kwa sasa anatamba na kibao kinachojulikana kama, ‘Baadaye Sana’ kilichotengenezwa chini ya mtayarishaji Pancho, ambacho kinafanya vizuri katika muziki huo.

Licha ya kutaka kuachia kibao hicho, Mabeste alishawahi tamba na vibao kama ‘Dhahabu’ alichomshirikisha Dully Sykes, Chiku, Mr. Blue na Mwana FA, ‘Pesa iko wapi’ pamoja na ‘Nacheza rafu’ ambazo ziliweza kufanya vizuri katika muziki wa kizazi kipya nchini.