Kaburu: Simba mtaipenda tu

NA CLEZENCIA TRYPHONE

LICHA ya timu ya Simba, kukubali kichapo cha mabao 3-0 dhidi ya Zesco katika mchezo wa sherehe yao ya ‘Simba Day’ mwishoni mwa wiki iliyopita, uongozi wa timu hiyo, umesema haujaumizwa na matokeo hayo kwa kuwa timu bado inaandaliwa.

Simba waliumana na Zesco katika uwanja wa Taifa Jijini Dar es Salaam Jumamosi ya wiki iliyopita, huku wanachama na mashabiki wa Simba wakijitokeza kwa wingi kuona usajili wao mpya wa kikosi chao.

Kwa mujibu wa Makamu Mwenyekiti wa Simba, Geofrey Nyange ‘Kaburu’ ambaye alizungukwa na mashabiki kibao mara baada ya kumalizika kwa mchezo huo, alisema, timu yao ni nzuri ila tatizo lilofanya mpaka wapoteze mchezo huo ni kutokana na timu kutokuwa pamoja kwa muda.

Kaburu alisema, wachezaji wao bado hawajaelewana, ila kwa kuwa wanaenda kambini Zanzibar kwa wiki tatu anaimani kubwa wakirejea watakuwa wameelewana na kufanya vema katika mechi zijazo.

Alisema, mfano katikati alikuwa akicheza Shabani Kisiga na Pierre Kwizera hawajawahi kucheza pamoja na hiyo ni mara ya kwanza, pia Raphael Kiongera na Hamis Tambwe, pamoja na Abd Banda na Donald Musoti.

“Timu yetu iko vizuri mno, na siku za usoni wanasimba wataifurahia sana, kwa kuwa wachezaji wetu wengi wapya hawajazoeana kama nilivyosema hapo awali, lakini watapata muda tu huko Zanzibar na watafanya vizuri,”alisema Kaburu.

Aidha Kaburu aliongeza kwa kuwataka wapenzi wa Simba na wanachama, kutoikatia tamaa timu yao kupitia mchezo huo mmoja tu, na wao kwa kuwa walihitaji ushindani ndio maana wakaichukua timu inayoshika nafasi ya pili katika ligi nchini kwao.