Wabunge wasikitishwa Yanga kutokwenda Kagame

Abbas Mtemvu

NA CLEZENCIA TRYPHONE

 

MBUNGE wa Jimbo la Iramba Mwigulu Nchemba na wa Temeke Abbas Mtemvu, wamesema kitendo cha Yanga kutoshiriki michuano ya Kagame inayoendelea kutimua vumbi Mjini Kigali, kunawapunguzia makali ya maandalizi ya ligi kuu na michuano ya Kimataifa.

Wabunge hao waliyasema hayo, wiki iliyopita katika tamasha la Matumaini ambapo Wabunge wapenzi wa Yanga walipoumana na wenzao wapenzi wa Simba na kuwalaza kwa mabao 3-2, katika mchezo uliopigwa dimba la Taifa Dar es Salaam.

Wakizungumza kwa nyakati tofauti, Nchemba alisema, kwa muono wake mashindano hayo ni makubwa ambayo yangewapa mwanga Yanga wa kujipanga zaidi kwa ajili ya msimu ujao, huku pia akilitupia lawama Baraza la vyama vya Soka Ukanda wa Afrika Mashariki na Kati CECAFA kwa kuwaondoa kisa aina ya wachezaji ambao ilitaka kuwapeleka.

“Unajua Yanga wamefanya usajili na hao wachezaji waliokuwa wakitakiwa kwenda uko, wamesajiliwa ndani ya Yanga, lakini kutokwenda kwao, ni uzuni kwao kwani wangejipanga na kuona mapungufu kwa kuwa kuna timu kubwa zinashiriki,”alisema Nchemba huku akimpongeza muandaaji wa tamasha la Matumaini Erick Shigongo.

Naye Mtemvu, alisema, yeye kama mpenzi wa Yanga na ni mlezi wa timu ya Wabunge wapenzi wa Yanga, hakupenda Yanga kutoshiriki katika michuano hiyo, huku akisema kuwa labda Yanga uongozi na benchi lao wanajua sababu za kutokwenda katika michuano muhimu kama hiyo.

“Mashindano yale ni mazuri, kwanza sisi wabunge tumewafungulia kwa ushindi hivyo basi watashinda sana mechi zao, na pia nampongeza Shigongo kwa kuandaa tamasha hili ambalo utukutanisha kila mwaka na kutufanya tubadilishane mawazo,”alisema Mtemvu.