HABARI MSETO BLOG

Meya Kapunga akwepa lawama

*Kifo cha ‘King’ wa Chadema chazua utata

 

Na, Christopher Nyenyembe, Mbeya

 

MSTAHIKI Meya wa Jiji la Mbeya,Athanas Kapunga amekanusha vikali lawama zinazotolewa dhidi yake juu ya kifo cha Mwenyekiti wa serikali ya mtaa wa Itiji,Ezekiel Mwaigoga (53) aliyefia gerezani .

 

Kuibuka kwa lawama hizo kunafuatia mvutano mkali wa kisiasa unaoendelea katika kata ya Itiji ambayo,Mstahiki Kapunga ndiye diwani wa kata hiyo kwa tiketi ya CCM na kwamba aliweza kushinikiza ipasavyo,marehemu Mwaigoga maarufu kwa jina la King afungwe gerezani.

 

Mstahiki Meya alielezea kwa undani jana na kufafanua kwa kina mazingira ya kifo cha King aliyekuwa Mwenyekiti wa mtaa wa Itiji kupitia Chama Cha Demokrasia na Maendeleo (CHADEMA) kuwa hausiki na kwamba amekuwa akionewa na kusakamwa na kundi la watu wachache juu ya matukio na mikasa inayotokea kwenye kata yake.

 

Mahojiano maalumu yaliyofanywa na Tanzania Daima kuhusu tuhuma hizo,zilimfanya Meya Kapunga akiri wazi kuwa kwa njia yoyote ile hapaswi kutupiwa lawama za kifo cha King wala kuingilia uhuru wa mahakama uliomtia hatiani kiongozi huyo wa mtaa na kusababisha ahukumiwe kifungo cha miaka saba.

 

“Siwezi kuhudhuria kila msiba wa mtu,mimi nipo kwenye majukumu mengine,kama mke wangu amekwenda msibani,watoto wangu wamekwenda,watakuwa wamekwenda kwa niaba yangu sio lazima niende mimi” alisema Kapunga.

 

Alisema kuwa ameshindwa kushiriki kwenye msiba huo kwa kuwa yupo kwenye kikao cha bodi za mamlaka ya maji kutoka mikoa ya Iringa,Ruvuma,Njombe na Mbeya hivyo itakuwa vigumu kuwepo mchana kutwa bila kujua taratibu za mazishi.

 

“Naomba,nawaomba mnihurumie sana,nioneeni huruma jamani,kweli kila jambo baya linalotokea kwenye kata yangu ni Kapunga,naiangalia sana afya yangu nimeugua kwa miezi sita siwezi kushiriki kila jambo,siwezi kuingilia kazi ya Mungu kwa kuwa kila mtu atakufa tu hata Kapunga siku yake ikifika atakufa” alisema Mstahiki Kapunga.

 

Alisema kuwa amechoshwa na lawama nzito zinazoelekezwa kwake na kutoboa siri ya migogoro kadhaa inayoibuliwa kwenye kata ya Itiji,maeneo ya Nonde kuwa imekuwa kata inayosifiwa kwa vitendo vya ushirikina(uchawi) kuliko kufikiria masuala ya maendeleo.

 

“Wewe ni mkazi wa jiji hili,hii kata yetu ni uchawi tu,tunaacha kuzungumzia mambo ya barabara,maji,shule tunagombana kwa mambo ya upuuzi,hao wanaonisakama walikuwa wapi kumwekea marehemu wakili,walikuwa wapi kumtibu mtu waliyepigana nae,ebu waulize” alilalamika Meya huyo.

 

Wakati Meya huyo akionekana kuguswa na lawama za kigo cha King,jana katika mazishi  hayo kulitanda gumzo zaidi wakilalamika kuwa marehemu King hakupaswa kutupwa gerezani kwa kosa la kupigana na kuhukumiwa kifungo cha miaka saba jela bila shinikizo la Meya huyo ambaye wanadai alikuwa na uhasama mkubwa wa kisiasa na marehemu King .

 

Binti wa marehemu,Irene Ezekiel alisema kuwa familia yao imepokea kwa mshituko mkubwa kifo cha baba yao ambaye kabla ya kukutwa na dhahama hiyo aprili 24 mwaka huu alikuwa mtu mwenye afya njema.

 

Baadhi ya ndugu waliozungumza na Tanzania Daima na majirani walikuwa wakisubiri taarifa za uchunguzi wa kifo cha King huku wakiendelea na taratibu za mazishi.

 

King aliyefariki juzi katika gereza la Ruanda jijini humo amezikwa jana katika makaburi ya Nonde ambako umati mkubwa wa watu walihudhuria kifo hicho,alizikwa kwa heshima zote za Chadema kwa kuwa alikuwa kiongozi kupitia chama hicho.