Ridhiwan Kikwete kuzindua rasmi mazoezi ya Wakulima Jazz Band

Mbunge wa Chalinze, Mheshimiwa Ridhiwan Kikwete anatarajiwa kuwa mgeni rasmi kwenye uzinduzi wa mazoezi ya Bendi ya Wakulima inayoundwa na wanamuziki wakongwe nchini.

 

Mbunge huyo ambaye ni mmoja wa wadau wakubwa wa muziki hapa nchini, atazindua mazoezi hayo yanayofayika kwenye ukumbi wa Jengo la Serikali ya Mtaa wa Kilwa, Ilala jijini Dar es Salaam ambako bendi hiyo imepiga kambi.

 

“Kwa heshima na taadhima Bendi ya Wakulima inakuomba uzindue rasmi mazoezi yake”, inasema sehemu ya barua ya bendi hiyo iliyosainiwa na Katibu wake, Gregory Ndanu.

 

Ndanu anazidi kusema kuwa  uzinduzi wa mazoezi hayo natazamiwa kuwa Desemba 14 mwaka huu.

 

Zaidi ya hayo, Ndanu anasema katika barua hiyo ya maombi kwa Ridhiwan kuwa bendi hiyo imetoa heshima hiyo kubwa kwake ikijua fika kuwa ni mdau mkubwa wa wakulima na wafugaji kutokana na jimbo analoliongoza kuwa na wakazi wengi wa kada hiyo.

 

Bendi ya Wakulima inaundwa na wanamuziki saba chini ya uongozi wa mkongwe wa kupapasa kinanda nchini, Abdul Ali Salvador.

 

Salvador ambaye awali alikuwa akijulikana kwa jina la uanamuziki la “Father Kidevu” kwa sasa anajuikana kama “Dakta Savador” kutokana na ufundi mkubwa katika kusakata kinanda na fani nzima ya muziki.

 

Wengine kwenye bendi hiyo ni mwanadada supa, Nanah Mwashiuya maarufu Vampire (muimbaji), Mfundo Juma “Mzumio” (muimbaji), Juma Membe (Mpiga solo), 

 

King Mafanya (Mpiga besi), Alphonce Paulo ambaye anapiga Drums na ,wama,uziki machachari na mwenye mvuto mkubwa, Christian Sheggy.

 

Kwa mujibu wa Ndanu,Bendi ya Wakulima ni mkombozi mkubwa kwa wakulima na wafugaji nchini kwa vile imeanzishwa ili kutoa elimu kuhusu umhimu wa kilimo na ufugaji wa kisasa kwa njia ya nyimbo na mapambio.

 

Aidha, bendi hiyo itakuwa ikiishajiisha serikali na vyombo vingine kuthamini kilimo na wakulima nchini kwa kuwa ndio haswa mhimili mkubwa wa uchumi na maendeleo binafsi na ya jumla hapa nchini.