Mzumbe, Kuehne wawapa somo watendaji

 Mwakilishi wa Kuehne Foundation Tanzania, Beatrice Millu (kulia), akimkabidhi cheti,  Paul Kuyi, mmoja wa washiriki wa mafunzo ya huduma kwa wateja, utaratibu wa manunuzi na kupima utendaji kwa maofisa wa ulinzi, madini na halmashauri mbalimbali na kufanyika jijini Dar es Salaam, mwishoni mwa wiki. (Picha na Francis Dande).

 Picha ya pamoja.

Mratibu wa mafunzo hayo, Dk. Omari Swalehe akiwa na Mwakilishi wa Kuehne Foundation Tanzania, Beatrice Millu.

NA MWANDISHI WETU

UONGOZI wa Chuo Kikuu Mzumbe kampasi ya Dar es Salaam, ikishirikiana na Taasisi ya Kuehne, wametoa mafunzo ya huduma kwa wateja, utaratibu wa manunuzi na kupima utendaji kwa maofisa wa ulinzi, madini na halmashauri mbalimbali hapa nchini.

Akizungumza wakati wa kufungua mafunzo hayo ya siku tatu, Mkuu wa chuo hicho kampasi ya Dar es Salaam, Profesa Prosper Ngowi, alisema lengo la mafunzo hayo ni kuboresha utendaji wa maofisa wa ngazi tofauti ili kupata matokeo bora hasa kwenye utendaji wa kila siku.

Alisema taasisi ya Kuehne inalenga kuwapa watendaji na wasomi hamasa ya kufanyakazi kwa kujituma huku wakijipima na kutarajia matokeo chanya kwa maendeleo ya nchi.

“Mkitumia vizuri semina hii mtaonesha mabadiliko kwenye utendaji wenu… hilo hasa ndio lengo la Kuehne kuona maendeleo kwenye utendaji wa maofisa wa ngazi tofauti,” alisisitiza Profesa Ngowi.

Kwa mujibu wa mkuu huyo wa kampasi, taasisi hiyo pia inawawezesha wanafunzi kupata mafunzo kwa vitendo katika maeneo tofauti.

Mratibu wa semina hiyo, Dk. Omari Swalehe, alisema hiyo ni semina ya tatu kufanyika chini ya ushirikiano wa Kuehne na Chuo Kikuu Mzumbe na kwamba matokeo yanapimwa kwa utendaji wa wanufaika wa semina hizo.

Alisema mradi huo wa miaka mitatu ulioanza mwaka 2016 utamalizika mwaka 2019 ukiacha alama ya mafaniko na maendeleo kwa watendaji wa serikali na wasomi.

“Tunauhusiano ambao tunatoa semina kwenye eneo la ‘logistics’ hii ni ya tatu hapa Mzumbe, ya kwanza tulijadili kuhusu Kilimo na Uhifadhi wa Chakula Ghalani wakati semina ya pili tulizungumzia kuhusu dawa za binaadamu, vifaatiba na miundombinu ya kuzifikisha kwa wananchi.

“…Hii ya tatu tunajadili masuala ya utaratibu wa mnanunuzi na huduma kwa wateja kwa watoa huduma kutoka taasisi za ulinzi, madini na halmashauri mbalimbali hapa nchini,” alisema Dk. Swalehe na kuongeza kwamba wanajadili namna sahihi ya kutoa huduma bora kwa wateja.

Alisema chini ya mradi huo wanafunzi wanakwenda kujifunza kwa vitendo kwenye makampuni na mashirika makubwa yakiwemo ya saruji ili kuona namna uzalishaji unavyofanyika.

Akizungumzia semina hiyo, Mwakilishi wa Taasisi ya Kuehne hapa Tanzania, Beatrice Millu alisema lengo la semina hizo ni kuwaandaa wasomi kufanyakazi kwa mpangilio wenye kuleta matokeo chanya.

“Kwa Afrika tunafanyakazi kwenye nchi 12 Tanzania ikiwemo na tulianza rasmi mwaka 2010 kwa kusaidia Logiostics kwa Mashirika yanayohudumia binaadamu na matokeo mazuri tumeyaona.

“...Hapa tunashirikiana na vyuo vikuu vya Mzumbe na Chuo Kikuu cha Dar es Salaam tunaegemea zaidi kwenye Logistics na Supply Chain, tunataka ifike mahali msomi anayehitimu kwenye vyuo hivyo awe na standard za kimataifa yaani sawa na mhitimu wa Havard tunapandisha hadhi ya elimu Tanzania,” alisisitiza Millu.   

Kwa mujibu wa Millu, taasisi yake inataka kuona wanafunzi wakipata elimu kwa vitendo zaidi kuliko nadharia kama ilivyo sasa huku akisisitiza kwamba huo ni mradi wa miaka mitatu.

Mwisho…