NMB kuongeza mikopo kwa kampuni

NA SALUM MKANDEMBA 

WAKATI Kampuni Bora 100 za Mwaka 2018/19, zikitarajiwa kutangazwa leo, Benki ya NMB imesema itaongeza kiwango cha mikopo inayoitoa kwa kampuni ndogo na za kati mara mbili na kufikia Shilingi trilioni 3 kwa miaka mitatu ijayo.

Hayo yalisemwa na Mkurugenzi Mtengaji wa NMB, Ineke Bussemaker, wakati akizungumzia udhamini wa NMB kwa hafla ya Kampuni Bora 100 za Mwaka 2018/19 (Top 100 Mid-sized Companies' Survey).

Kwa miaka mitatu iliyopita, NMB imetoa mikopo yenye thamani ya Shilingi trilioni 1.5 kwa kampuni ndogo na za kati, ambako Bussemaker alisema kampuni zinazowekeza katika kufanya biashara kijiditali zipo katika nafasi nzuri zaidi ya kufanya vizuri kibiashara.

"Hatima ya uchumi wa nchi upo katika kufanya biashara kidijitali ili kuhakikisha mifumo ya utendaji inakwenda kwa kasi,” alisema na kuongeza kuwa kampuni zilizoweza kuweka mifumo sawa ya dijitali zipo katika nafasi bora zaidi ya kupata mikopo kutoka katika benki yake.

Alisema NMB inazidi kuwekeza katika mifumo ya utoaji huduma kwa njia za kidijitali ili kuwafikia wananchi wengi zaidi wanaohitaji huduma zake nchini kote.

Kampuni Bora 100 Tanzania ni shindano linaloendeshwa na Mwananchi Communications Limited kwa kushirikiana na KPMG, ambapo mbali na NMB, wadhamini wengine ni pamoja na Soko la Hisa la Dar es Salaam (DSE), Azam Media na Hoteli ya Hyatt Regency.

Akitoa matokeo ya utafiti wa Kampuni Bora 100 za Mwaka 2018/19, Mtafiti Kiongozi wa Kampuni ya AZ Advisory, Dk. Remidius Ruhinduka, alisema asilimia 23 ya Kampuni za kati nchini zinaona mwenendo wa uchumi nchini kwa kipindi cha miezi sita iliyopita sio mzuri.

Mkutano huo wa utafiti umefanyika ikiwa imesalia siku moja kufikia fainali za Shindano la Top100 ambayo inafanyika leo, katika fainali hizo kampuni bora 100 za kati zitatangazwa.

Dk Ruhinduka alisema asilimia kubwa ya wafanyabiashara wana matumaini ya kuimarika kwa uchumi licha ya changamoto walizonazo katika biashara zao.

"Mtazamo wa wafanyabiashara kwa kipindi cha miezi 6 iliyopita asilimia 55 wanasema biashara inaimarika, asilimia 22 wanasema iko sawa na asilimia 23 wanasema mwenendo sio mzuri. 

“Hata hivyo kwa kipindi cha miezi sita ijayo, asilimia 60 wanasema uchumi utaimarika, asilimia 28 utakuwa sawa na asilimia 12 itakuwa mbaya," amesema Dk. Ruhinduka.