Watanzania, Wakenya wang’ara Rock City Marathon

Mwanariadha Mourice Masima kutoka Kenya akimaliza katika nafasi ya kwanza kwenye mbio za KM 42 Rock City Marathon zilizofanyika jijini Mwanza leo baada ya kutumia  muda wa saa 2:19:14. Kivutio katika mbio hizo ilikuwa ni Mkuu wa Mkoa wa Mwanza , John Mongella ambae licha ya kuzindua mbio hizo, alikimbia kikamilifu mbio za KM 42 akiambatana na baadhi ya viongozi  waandamizi  wa serikali akiwemo Mkuu wa Wilaya ya Magu  Dk. Philemon Sengati.

Mwanariadha Emmanuel Giniki  kutoka Tanzania akimaliza katika nafasi ya kwanza kwenye mbio za Kilometa 21 Rock City Marathon zilizofanyika jijini Mwanza jana, baada ya kutumia  muda wa 1:04:09 akifuatiwa na Mkenya Daniel Kayioki aliyetumia muda wa saa 1:04:47. 

 Mkuu wa Mkoa wa Mwanza , John Mongella  katikati akishiriki katika mbio za km 42 Rock City Marathon zilizofanyika leo jijini Mwanza. 

 

Mwanariadha Mourice Masima Kutoka Kenya leo ameibuka mshindi wa kwanza kwenye mbio za km 42 Rock City Marathon zilizofanyika jijini Mwanza huku Mtanzania Emmanuel Giniki kutoka Tanzania akifanikiwa kuiwakilisha vyema Tanzania katika mashindano hayo baada ya kuibuka mshindi wa kwanza katika mbio za km 21. 

Katika mbio za km 42, Masima alitumia muda wa saa 2:19:14 akifuatiwa na mshiriki mwenzake kutoka Kenya , James Emuria alietumia muda wa saa 2:19:58 wakati katika mbio za km 21, Giniki alitumia saa 1:04:09 akifuatiwa na Mkenya Daniel Kayioki alietumia muda wa saa 1:04:47.

Kivutio katika mbio hizo ilikuwa ni Mkuu wa Mkoa wa Mwanza , John Mongella ambae licha ya kuzindua mbio hizo, alikimbia kikamilifu mbio za km 42 akiambatana na baadhi ya viongozi  waandamizi  wa serikali akiwemo Mkuu wa Wilaya ya Magu  Dk. Philemon Sengati .

Nafasi ya tatu katika mbio za km 42 pia ilichukuliwa Mkenya  Declerk Omary  aliyetumia muda wa saa 02:20:00 wakati katika mbio za km 21 mshindi wa tatu ni Mokua Edwini Kutoka Kenya.

Upande wa wanawake mshindi wa kwanza  mbio za km 42 ni Naomi Jepngetich kutoka Kenya  aliyetumia muda wa saa 02:44:19 huku Mtanzania Failuna Matanga kutoka Tanzania akiibuka mshindi wa kwanza katika mbio za km 21 akifuatiwa na Beatrice Nyaboke kutoka Kenya alieshika nafasi ya pili.

 Washindi wa kwanza katika mbio za km 42 katika mashindano hayo  yaliyofanyika kwa mara ya tisa mfululizo  jijini humo  waliibuka na kitita cha Sh 4 milioni kila mmoja, washindi wa pili Sh 2 mil na washindi watatu Sh Mil 1 huku washindi wa nne hadi wa kumi wakipata kiasi cha laki 5 kila mmoja kwa wanaume na wanawake.

Kwa upande wa mbio za km 21 washindi wa kwanza  kwa upande wa  wanaume na wanawake walijinyakulia pesa tasliu kiasi cha sh mil 3 kila mmoja, washindi wa pili kiasi cha sh mil 1 na sh 750 kwa washindi wa tatu huku washindi wane hadi wa kumi nao wakiambulia kiasi cha laki 3 kila mmoja.

Wakizungumzia siri ya ushindi wao, mbali na kusifia uratibu mzuri wa mbio hizo uliowawezesha kukimbia bila changamoto yoyote , walisema  ni kujituma kufanya zaidi mazoezi na kukaa kambini muda mrefu ili kufanya vizuri katika michuano ya mwaka huu.

“Maandalizi  ni mazuri  na washiriki walikiwa wengi wenye ushindani na ninashukuru Mungu nimefanikiwa kuibuka mshindi na hatimaye  watanzania tumeweza kuibuka washindi katika mbio za km 21,”  alisema Giniki.

Katika mashindano hayo ilishuhudiwa washiriki ambao pia ni wadhamini wa mbio hizo kutoka  makampuni ya Puma Energy Tanzania, Tiper,Rock City Mall,  NSSF, Gold Crest, New Mwanza Hotel,  CF Hospital, Coca Cola, Metro Fm, EF Outdoor,  KK Security, Belmont Fairmount Hotel , Bigie Customs na Global Education Link wakishiriki kikamilifu katika mbio za KM 5 sambamba na watu wenye ulemavu wa ngozi yaani Albino.

Akizungumza kabla ya kukabidhi zawadi kwa washindi, Mongella  aliwapongeza washiriki na waandaaji wa mbio hizo na kutoa wito kwa wadau mbalimbali kushirikiana kwa pamoja ili kurejesha hadhi ya mchezo wa riadha nchini.

“Nitumie fursa hii kutangaza rasmi kuwa kila mwisho wa wiki tutakuwa na utaratibu wa kufanya mazoezi ili tujiweke sawa kiafya. Tanzania inaweza kurejea katika ramani ya dunia kwenye michezo kama tukijikita katika maandalizi mazuri ya kuibua na kuviendeleza vipaji vya vijana wetu nchini hasa kuanzia ngazi ya shule za msingi.” Alisema.

Naye Mwenyekiti wa mbio hizo Bw Zenno Ngowi  alisema mbali na kusaidia utambuzi, uhamasishaji na uibuaji wa vipaji vya riadha nchini hususani katika ukanda huu wa Ziwa, mbio hizo pia zinalenga kutangaza utalii wa ndani kwa kupitia michezo, huku akitoa wito kwa wadau wa utalii kuunga mkono mbio hizo