Waziri Ummy amwagia sifa msanii Ester Kusekwa

  Msanii wa nyimbo za injili, Ester Tindos Kusekwa, akitumbuiza wakati wa Sherehe ya Maadhimisho ya Siku ya Wanawake Duniani, iliyofanyika Kisesa Mkoa wa Mwanza, hivi karibuni. (Picha na Sitta Tumma).

NA SITTA TUMMA, MWANZA

WAZIRI wa Afya, Maendeleo ya Jamii, Jinsia, Wazee na Watoto, Ummy Mwalim, 'amemmwagia' pongezi msanii, Ester Tindos Kusekwa, akisema kazi yake inafundisha mema Jamii.

Amesema msanii huyo wa jijini Mwanza, anayeimba nyimbo za injili (Gospel) kazi yake imejaa ujumbe wa kuelimisha jamii, juu ya matendo mema.

Waziri Ummy alitoa pongezi hizo kwa msanii huyo, alipohutubia mamia ya wananchi mkoani Mwanza, katika Maadhimisho ya Siku ya Wanawake Duniani, hivi karibuni.

Maadhimisho hayo ya 'Women's Day, ilifanyika kimkoa kwenye Uwanja wa Michezo, Kisesa Wilaya ya Magu, Mkoa wa Mwanza.

"Nakupongeza sana mwimbaji, Ester Tindos Kusekwa. Umeimba vizuri, nimependa sana nyimbo zako.

"Nyimbo zako zimejaa ujumbe unaolenga kuleta maendeleo, mshikamano na maendeleo ya nchi. Nasema hongera sana mwanamke mwenzangu," alisema Waziri Ummy.

Katika Maadhimisho hayo ya Siku ya Wanawake Duniani, msanii Ester anayetamba na Albamu ya Magufuli Jembe, alikuwa miongoni mwa wasanii waliotumbuiza kwenye sherehe hizo.

Ester alipata kutuzwa vitu mbalimbali na viongozi wa kada tofauti, waliohudhuria sherehe hizo, kulingana na kilichoonekana kukonga nyoyo na nafsi zao.

"Mwakani nitakuwa Mkoa wa Simiyu, katika Siku ya Wanawake Duniani. Nahitaji sana ushirikiano wa wasanii na jamii yote. Hongera sana dada Ester Tindos Kusekwa," alisema waziri huyo.

Msanii Ester anayehitaji ushirikiano wa wadau, Serikali na wasanii wenzake, kwa sasa anatamba na nyimbo mbalimbali, ikiwamo ya Magufuli Jembe, inayobeba jina la albamu ya nyimbo sita.

Akizungumza na Tanzania Daima jijini Mwanza, Ester alisema albamu nyingine iliyopo sokoni ni inayojulikana kwa jina la Nakalolela ya mwaka 2010.

Alisema albamu hiyo iliyofanyiwa video mwaka 2015, ikiwa na nyimbo saba za injili, inaelekeza namna jamii wanavyopaswa kuishi kwa upendo, amani na kumcha Mungu.

"Ipo pia albamu ya Nyota Yangu. Hii nayo ina nyimbo saba ya mwaka 2018. Ni audio.

"Ile albamu ya Magufuli Jembe imebeba nyimbo za kijamii, ukiwamo wimbo wa Tanzania ya viwanda, CCM juu, amani na wanawake," alisema Ester.

Ester alisema anahitaji sapoti kutoka kwa wadau wa muziki, ikiwamo Serikali na wasanii wenzake wa muziki.