Ibdhu FC yatoa dozi nene Swaiba Cup

Mgeni rasmi Tullo Chambo akisalimiana na wachezaji wa Ibdhu FCwakati wa ufunguzi wa Ligi ya Swaiba Cup 2019 kwenye uwanja wa Ngunguti Vikindu Mkuranga mkoani Pwani. (Na Mpiga Picha Wetu).

 Mgeni rasmi Tullo Chambo akisalimiana na waamuzi wa mchezo huo.

 Mratibu wa mashindano hayo, Asha Mbata, alisema akizungumza wakati akimkaribisha mgeni rasmi.

 Mgeni rasmi akizungumza wakati wa ufunguzi wa mashindano hayo.

NA MWANDISHI WETU, MKURANGA

TIMU ya Ibdhu FC imeanza vyema katika michuano ya Swaiba Cup, baada ya juzi kuibuka na ushindi wa mabao 4-2 dhidi ya Zamalek FC, katika mchezo wa ufunguzi uliopigwa kwenye Uwanja wa Ngunguti, Vikindu Wilaya ya Mkuranga mkoani Pwani.

Huo ni msimu wa pili wa michuano hiyo ya Swaiba , ambayo yanalengo la kukuza vipaji vya vijana na kuwaondoa katika makundi yasiyofaa.

Katika mechi hiyo ya ufunguzi, mabao ya Ibdhu FC yalifungwa Ibrahim Karumbi aliyepiga 'hat trick' na Babu Funga, huku ya Zamalek yakifungwa na Selemani Doweko na Ally Adebayor.

Mratibu wa mashindano hayo, Asha Mbata, alisema michuano hiyo imeandaliwa na kampuni Ibdhu Company Ltd,  lengo ni kujitangaza kibiashara na biashara zake ambazo zipo Iringa Mafinga, Vikindu Mkuranga Pwani, Dar es Saalam na Sumbawanga.

"Lakini pia ni kuunga mkono sera ya serikali ya kukuza vipaji, pamoja na kuwaweka vijana pamoja ili kuwaepusha na makundi yasiyofaa," alisema.

Alisema mashindano hayo yamegawanyika katika makundi manne ya timu tatu, huku washindi wawili watakwenda hatua ya robo fainali.

Mbata, alisema mshindi wa kwanza atapata Ng'ombe na mpira mmoja, wakati wa pili Mbuzi na mpira mmoja, huku watatu ni mpira mmoja.

Ligi hiyo iliendelea jana kwa mechi moja kati ya  Toyo FC vs Ibdhu Academy.