Wananchi waipongeza NHIF kwa kuijali jamii

Na Mwandishi Wetu

WANANCHI kutoka maeneo mbalimbali ya Mkoa wa Dar es Salaam wameupongeza Mfuko wa Taifa wa Bima ya Afya kwa kitendo cha kutoa huduma za upimaji wa afya bure katika kuadhimisha maadhimisho ya Wiki ya Utumishi wa Umma ambayo yanahitimishwa leo.

Wakizungumza kwa nyakati tofauti, wamesema kuwa suala la afya ni suala muhimu kwa maisha ya wananchi lakini pia ili mwananchi yoyote aweze kuchangia pato la familia na Taifa ni lazima awe na afya njema hivyo kitendo cha kutoa elimu ya afya kwa wananchi ni kitendo kikubwa na kupigiwa mfano.

“Kitendo cha kujua hali ya afya yako kama mwananchi kinakupa nguvu ya kupanga mipango yako ya maendeleo, suala la afya ni suala nyeti sana kwa kuwa hakuna mtu yoyote anayeweza kushiriki shughuli za maendeleo akiwa na afya mbovu, nawapongeza sana NHIF kwa kuweka huduma hizi tena bure imetusaidia sana ambao tumepata huduma hii,” alisema Bw. Mohamed Shitindula Mkazi wa Mwananyamala.

Mfuko ulianza kutoa huduma hizo tangu Juni 16 hadi Juni 23, mwaka huu katika viwanja vya Ofisi yake ya Mkoa wa Kinondoni iliyopo, Mwenge njia ya kuelekea Coka Cola.

Mwananchi mwingine ambaye pia ni Mwanachama wa NHIF, Bw. Fanuel Msangi alisema kuwa huduma za Mfuko wa Taifa wa Bima ya Afya ni mkombozi wa majanga ya magonjwa ambayo yanaweza kuwapata wananchi wakati wowote hivyo akawaomba kujiunga na Mfuko ili kuwa na uhakika wa kupata matibabu wakati wowote.

“Ukiwa na kadi ya NHIF unakuwa na uhakika wa matibabu mahali popote unapokuwa, kwa mfano mimi kupitia uanachama wangu familia yangu inahudumiwa pamoja na wazazi wangu hivyo nimeona faida kubwa ya kuwa ndani ya huduma za Mfuko na nitumia fursa hii kuwapongeza kwa maboresho makubwa ambayo wameyafanya katika huduma zao,” alisema Bw. Msangi.

Kwa upande wake Meneja wa NHIF, Kinondoni Bw. Innocent Mauki, alisema kuwa, Mfuko umetoa huduma za upimaji wa afya bure ili kuwezesha wananchi wengi zaidi kupata huduma hizo na kufahamu hali ya afya zao pamoja na elimu itakayowawezesha kujikinga na magonjwa yasiyoambukiza.

“Katika Wiki hii ambayo Mfuko tuliamua kudhimisha Wiki ya Utumishi wa Umma kwa kutoa huduma kwa wananchi, tumefarijika kuona mwamko mkubwa wa wananchi umejitokeza na kupima afya pamoja na kupata elimu ya huduma za bima ya afya. Nitoe rai tu kwa wananchi wote ambao wako nje ya Mfumo wa bima kujiunga na huduma hizi kwa kuwa magonjwa huja bila taarifa na Mfuko umejiandaa kuhakikisha unatoa huduma bora kwa wanachama wake,” alisema Bw. Mauki.

Alisema kuwa mbali na huduma hizo ambazo zimetolewa Mkoa wa Dar es Salaam, Mfuko kupitia Ofisi za Mikoa zilitumia fursa hii kutembelea Vituo vya kutolea huduma kwa lengo la kuona huduma wanazopata wanachama wake na kupata mrejesho kutoka kwao.