JUMUIYA YA PATEL SAMAJ YATOA MILIONI 20/- KUSAIDIA MATIBABU YA MOYO KWA WATOTO

NA FARAJA EZRA

TAASISI ya Moyo Jakaya Kikwete (JKCI) imepokea Hundi ya shilingi milioni 20 kutoka Jumuiya ya Patel Samaj nchini India kwa ajili ya kusaidia gharama za upasuaji kwa watoto wenye matatizo ya moyo.

Aidha upasuaji huo utaanza rasmi  June 25 mwaka huu kwa watoto kumi wenye matatizo ya moyo ili kunusuru maisha yao.

Akipokea Hundi hiyo katika Taasisi ya Moyo Jakaya Kikwete, Mkuu wa Mkoa wa Dar es Salaam, Paul Makonda, alisema fedha hizo ni maalum kwa ajili ya kusaidia wazazi wa watoto wasio na uwezo wa kugharimikia gharama  za upasuaji wa moyo.

Makonda aliwashukuru Jumuiya ya Patel kwa kujitoa kusaidia watoto ambao walizaaliwa wakiwa na shida ya moyo ili kunusuru maisha yao.

"Kwa kutambua mchango wa Jumuiya ya Patel nitachangia gharama za upasuaji kwa watoto 60 watakaofanyiwa upasuaji kutoka mwezi jully hadi Decemba mwaka huu ambapo  kila mwezi watoto kumi watafanyiwa upasuaji katika taasisi hiyo,"alisema Makonda. 

Pia amewataka wadau mbalimbali kujitokeza kuchangia shughuli za upasuaji kwa watoto kwa sababu baadhi ya wazazi hawawezi kumudu gharama hizo. 

Naye Mkurugenzi Mtendaji wa JKCI Prof. Mohamed Janabi alisema mwaka jana  walizaaliwa jumla ya  watoto milioni mbili kati yao waliofanyiwa upasuaji ni zaidi ya  watoto  elfu ishirini. Hivyo idadi ya watoto wanaozaliwa na matatizo ya moyo huongezeka kill mwaka.

Alisema taasisi ya JKCI pia  ina hadhi ya kimataifa hivyo wanahitaji vifaa vya kutosha ili kutoa huduma bora na kwa wakati maalum  kwa wahitaji.

"Tunapokea watu kutoka Jamhuri ya Kidemokrasia ya Kongo kutafuta matibabu, hivyo tunaiomba serikali itusaidie kuchangia baafhi ya vifaa vya upasuaji lakini pia upanuzi wa eneo la kutolea huduma,"alisema Prof. Janabi.

Pia Mwenyekiti wa Jumuiya ya Patel Samaj Harish Patel alisema wameguswa kutoa huduma za upasuaji wa moyo hasa kwa watoto bure bila gharama yeyote.

"Tutashirikiana bega kwa bega na taasisi ya JKCI  katika utoaji huduma hiyo kwa watoto ili kurejesha matumaini kwa wazazi na walezi wa watoto hao,"alisema Patel.