TTB kutumia SADC kutangaza vivutio vya utalii

Ofisa Habari-TTB, Geofrey Tengeneza.

Na Suleiman Msuya

BODI ya Utalii Tanzania (TTB), imesema itatumia Mkutano wa 39 wa Jumuiya ya Maendeleo Kusini mwa Afrika (SADC), kutangaza vivutio vya utalii na fursa zilizopo sekta ya utalii nchini.

Mkutano wa 39 wa SADC unatarajiwa kufanyika kuanzia Agosti 4 hadi 18/2019 ambapo Agosti 4 hadi 8/2019 itakuwa wiki ya viwanda na baadae vikao vya kitaaluma na Agosti 17 na 18 utakuwa mkutano wa viongozi wakuu wa jumuiya.

Kupitia mkutano huo ambao unashirikisha nchi 16 wanachama wa SADC na watu zaidi ya 1,000 Rais John Magufuli anatarajiwa kuchukua kijiti cha Uenyekiti kwa mwaka mmoja.

Serengeti National Park.

Akizungumzia walivyojipanga Ofisa Habari wa TTB, Geofrey Tengeneza wakati akizungumza na Tanzania Daima jana jijini Dar es Salaam alisema bodi imeandaa mipango ambayo itasaidia mkutano huo kuancha ujumbe wenye faida kwa nchi.

Tengeneza alisema TTB imeweka mazingira rafiki ambayo yatasaidia kundi linalohusika na sekta ya utalii kunufaika na mkutano huo hivyo kuwaomba wadau wa sekta hiyo kujitokeza na kuitumia fursa hiyo.

“TTB tumejipanga vizuri kwa kushirikiana na kamati ya maandalizi tumehakikisha kampuni zinazotoa huduma ya utalii zinatumia fursa hii ya kuandaa mkutano ili na nchi inufaike kwa sasa na baadae,” alisema.

Ofisa Habari huyo alisema watatumia mkutano wa SADC kwa kuweka matangazo mbalimbali ndani ya ukumbi na nje ya ukumbi, vipeperushi na kuwapatia taarifa kuhusu sektan hiyo ili wageni wawezi kutembelea vivutio vilivyopo.

Alisema watahakikisha wageni zaidi ya 1,000 wanatambua vivutio vilivyopo nchini kama Serengeti, Ngorongoro, Mikumi, Ruaha, Bugiri, Katavi, Sanane, Zanzibar na kwingineko.

“Tulitoa nafasi kwa kamapuni za utalii kuwasiliana na wageni kutoka nchi za SADC taarifa zilizopo mwitikio ni mkubwa ambapo wapo ambao wameahidi kutembelea vivutio vyetu baada ya mkutano na wengine wanatarajia kurudi nchini,” alisema.

Alisema iwapo mwikitio utakuwa mkubwa kwa wageni wengi kutembelea vivutio hapa nchini itasaidia kukuza uchumi na maendeleo nchini.

Mkutano wa SADC utashirikisha nchi 16 ambazo ni Tanzania, Malawi, Msumbiji, Zambia, Zimbabwe, Afrika Kusini, Shelisheli, Mauritius, Angola, Comoro, Madagascar, Botswana, Eswantin, Namibia na DRC.