Kolokolo Domorefu chachu ya uchumi Shemomeza

NA SULEIMAN MSUYA, MUHEZA

MRADI wa Uhifadhi Endelevu na Usimamizi wa Misitu kwa Uhifadhi wa Ndege Kolokolo Domorefu katika Milima ya Usambara Mashariki umetajwa kukuza uchumi wa wanavijiji.

Mradi huo wa uhifadhi Ndege aina ya Kolokolo Domorefu unatekelezwa na Shirika la Nature Tanzania na wadau mbalimbali chini ya ufadhili wa Critical Ecosystem Partnership Fund (CEPF).

Wakizungumzia mradi huo viongozi na wanakijiji wa  Kijiji cha Shemomeza, Kata ya Amani wilayani Muheza mkoani Tanga walisema mradi huo ni mkombozi wa misitu na maisha ya wananchi.

Mwenyekiti wa Kijiji cha Shemomeza, Hamisi Baruti, alisema mradi huo umewezesha wanavijiji  kuwapatiwa rasilimali mbalimbali kama mazoa ya viungo, ng'ombe wa maziwa na nguruwe.

Alisema pia Nature Tanzania kwa kushirikiana na Shirika la Kuhifadhi Misitu ya Asili Tanzania (TFCG), wamekuwa wakitoa elimu kwa wananchi, watoto wa shule za msingi na sekondari kutambua umuhimu wa utunzaji misitu na ndege huyo.

Baruti alisema wanavijiji wenye misitu inayopakana na Msitu wa Uhifadhi Mazingira Asili Amani walikubali kukata miti ya Mihesi ambayo sio asili na kupanda ya asili na mazao ya viungo ili kulinda ndege Kolokolo Domorefu anaelekea kutoweka.

"Ndege Kolokolo Domorefu amekuwa fursa nzuri kiuchumu hapa kijijini baada ya Shirika la Nature Tanzania kuja na mradi wa kumlindaa lakini pia wanakijiji wamenufaika kiuchumi na mazingira," alisema.

Mtendaji wa Kijiji hicho Michael Siafu, alisema mradi wa Kolokolo Domorefu umechochea ujifadhi hali ambayo inasababisha amani kuwa salama kimazingira.

"Huyu ndege ni fursa yakipekee hapa kwetu na nchini kwa ujumla Wizara ya Maliasili na Utalii ikiamua kumtangaza mapato yataongezeka kwa wanakijiji na nchi," alisema.

Ofisa Mtendaji wa Kata ya Amani, Hadija Salim alisema ofisi yake imejipanga kushirikiana na wadau wote ambao wanagusa maisha ya wananchi wakiamini hivyo ndio mkakati wa kuifikisha Tanzania katika uchumi wa kati.

Aliwataka wanavijiji wengine kuiga mfano huo wa wenzao kujitolea kutoa maeneo yao ili kumlinda Kolokolo Domorefu ambaye anatajwa kuadimika.

Mkulima wa mazoa ya viungo kijijini hapo Amir Said, alisema anawashukuru Nature Tanzania kumuwezesha mbegu za viungo ili kushirikiana nao kumlinda ndege Kolokolo Domorefu.

"Nimetoa eneo langu ili Nature Tanzania wapande miti asili kuwalinda Kolokolo Domorefu, lakini nimefaidika na mbegu za viungo kama Karafuu, Mdalasini, Pilipili Manga na Iliki vimeanza kubadilisha maisha yangu," alisema.