Waandishi watakiwa kuzingatia usawa wa kijinsia kwenye USMJ

Mhadhiri kutoka Chuo cha Kilimo Sokoine (SUA), Profesa John Jeckoniah ambaye amebobea katika masuala ya jinsia akifafanua jambo wakati alipokuwa akitoa mada inayozungumzia kwa kina kuhusu tofauti ya jinsi na jinsia na majukumu yao katika jamii. 

Mkurugenzi Msaidizi wa Shirika la Kuhifadhi Misitu ya Asili Tanzania(TFCG)Emmanuel Lyimo akizungumza alipokuwa akifungua rasmi semina ya mafunzo ya masuala ya jinsia ambayo yameandaliwa na shirika hilo kwa ajili ya kuwajengea uwezo na uelewa waandishi wa habari kutambua mambo yanayohusu jinsia na jinsi katika shughuli mbalimbali zikiwemo za ushiriki wa wanawake na wanaume katika usimamizi wa misitu ya asili nchini.

Ofisa Uhusiano na Mawasiliano kwa umma kutoka TFCG, Bettie Luwuge (wa kwanza kushoto), akiwa na washiriki wengine wa semina ya kuwajengea uwezo waandishi wa habari kuhusu masuala ya jinsi na jinsia ambayo inafanyika mkoani Morogoro.

Meneja Mradi wa Kuhifadhi Misitu kwa Kuwezesha Biashara Endelevu ya Mazao ya Misitu (CoFoREST) kutoka TFCG Charles Leonard akielezea mikakati ya shirika hilo katika kutekeleza miradi mbalimbali inayohusu usimamizi wa misitu ya asili nchini na namna ambavyo wamejipanga katika kuendeleza miradi iliyoanzishwa katika maeneo ya miradi kwa kushirikiana na wananchi wa maeneo husika pamoja na Serikali.

  

NA SULEIMAN MSUYA, MOROGORO

WAANDISHI wa habari nchini wameshauriwa kuandika habari za  Usimamizi Shirikishi wa Misitu ya Jamii (USMJ) kwa kuzingatia usawa wa kijinsia ili kuchochea maendeleo kwa jamii husika.

Ushauri huo umetolewa na Mhadhiri Mwandamizi wa Chuo Kikuu cha Kilimo Sokoine (SUA), Profesa John Jeckoniah wakati akitoa mafunzo kwa waandishi wa habari kutoka kwa vyombo vya habari mbalimbali nchini.

Alisema mafunzo hayo jinsia ambayo yameamdaliwa na Shirika la Kuhifadhi Misitu ya Asili Tanzania (TFCG) na Mtandao wa Usimamizi wa Misitu ya Jamii Tanzania ((MJUMITA) yataweza kubadilisha uelewa wa waandishi wa habari nchini kwa kuandika habari zenye usawa na uwiano.

Prof.Jeckoniah iwapo waandishi wa habari wakijengewa uwezo katika eneo hilo wataweza kutoa habari zenye tija na kuchochea mabadiliko kwa jamii kwa ujumla.

Alisema uwiano wa masuala ya kijinsia nchini bado upo chini hivyo njia sahihi ya kufanikiwa katika eneo hilo ni kuwajengea uwezo waandishi ili wawe na uwanja mpana katika kuripoti hasa kwenye USMJ.

"Katika hali ya maendeleo nchini uwiano wa kijinsia bado haupo vizuri pamoja na ukweli kuwa wanawake wanaweza kufikia rasilimali ila uamuzi wa mwisho kuhusu matumizi ya rasilimali inabakia kwa wanaume jambo ambalo linapaswa kupingwa na wadau wote," alisema.

Alisema juhudi za kubadilisha jamii zinafanyika kwa kuwajengea uwezo wahusika wote ili kwenda kwa pamoja.

"Serikali imekuwa ikifanya jitihada kwa kuandaa sera, sheria na miongozo ila tatizo kubwa lipo ngazi ya chini za utekelezaji hivyo wanawake kuwa waathirika wakubwa na njia ya kutoka hapo ni waandishi kutumia nafasi zao kubadilisha," alisema.

Mhadhiri huyo alitoa rai kwa wawakilishi wa wananchi kuzingatia masuala ya kijinsia katika mipango ya maendeleo ili kuchochea maendeleo.

"Viongozi wapya ambao wamepewa nafasi na wananchi wanapaswa kujikita katika kuelewa kwa kina namna ya dhana ya jinsia inavyoweza kuchochea maendeleo kwa jamii ikiwemo inayojihusisha na USM," alisema.

Mkurugenzi Msaidizi wa TFCG, Emmanuel Lyimo alisema mafunzo hayo kwa waandishi wa habari kuhusu jinsia ni moja ya mkakati wao kwenye Mradi wa Kuleta Mageuzi katika Sekta ya Mkaa Tanzania (TTCS) ambao umechochea mabadiliko makubwa kwenye USM.

Alisema mikakati mingine ni kuchochea shughuli za maendeleo, kulinda mazingira, mawasiliano na uraghibishi, ushirikiano na wadau mbalimbali na kujenga taasisi imara yenye nguvu.

"Imani yetu ni kwamba kupitia mafunzo haya waandishi mtakuwa na uelewa mpana wa kuandika habari za jinsia hasa kwenye eneo la USMJ," alisema.

Meneja Mradi wa TTCS, Charles Leonard alisema mradi huo ulijikita kuwainua wananchi kwa kuzingatia usawa wa kijinsia jambo ambalo limesaidia uwe unapokelewa vizuri katika maeneo mengi.

Leonard alisema awamu ya kwanza na ya pili wamefanikiwa kuwepo kwa matumizi bora ya ardhi kwenye hekta 130,000.

"Pia mradi umechochea uhifadhi wa misitu kwenye vijiji, kukuza uchumi wa wanavijiji na kijiji kwa ujumla na kukabiliana na mabadiliko ya tabia nchi," alisema.

Alisema kwa sasa wanatekeleza awamu ya tatu ya mradi ambao unajulikana kama Mradi wa Kuhifadhi Misitu kwa Kuwezesha Biashara Endelevu ya Misitu (CoFoREST).

Meneja huyo alisema mradi wa CoFoREST utahusisha wilaya nyingi zaidi huku mkazo ukijikita kwenye kuwajengea uwezo watumishi na wataalam kutoka Serikalini ili watekeleze mradi wenyewe.