MSHINDI KUHIFADHI QUR'AN KUIBUKA NA NYUMBA YA MIL.40

Mkurugenzi wa Taasisi ya Al-Hikma, Sheikh Nurdin Kishk (kushoto) na Mkuu wa Wilaya ya Temeke Godwin Gondwe kulia wakiwakabidhi bendera ya Taifa washiriki wa shindano la Kimataifa la Kuhifadhi Qur'an litakalofanyika katika Uwanja wa Benyamin Mkapa jijini Dar es Salaam.

 

Mkurugenzi wa Taasisi ya Al-Hikma, Sheikh Nurdin Kishk (kushoto) na Mkuu wa Wilaya ya Temeke Godwin Gondwe kulia wakionesha mfano wa nyumba ambayo mshindi wa kwanza tapewa na Benki ya PBZ iwapo mshindi atakuwa Mtanzania katika shindano la Kimataifa la Kuhifadhi Qur'an litakalofanyika katika Uwanja wa Benyamin Mkapa jijini Dar es Salaam.

 

NA SULEIMAN MSUYA

MSHINDI wa Kwanza wa Mashindano ya Kimataifa ya Kuhifadhi Qur'an yanayoandaliwa na Taasisi ya Al-Hikma anatarajiwa kupewa zawadi ya nyumba nyenye thamani ya shilingi milioni 40.

Hayo yamesemwa na Mkurugenzi wa Taasisi ya Al-Hikma, Sheikh Nurdin Kishk wakati akizungumza na waandishi wa habari katika ofisi ya Mkuu wa Wilaya ya Temeke jijini Dar es Salaam.

Sheikh Kishk amesema zawadi hiyo imetolewa na Benki ya Mwananchi Zanzibar (PBZ) iwapo mshindi wa kwanza atakuwa Mtanzania.

Amesema iwapo mshindi wa kwanza hatakuwa Mtanzania Taasisi ya Al-Hikma itatoa shilingi milioni 20 na zawadi zitakuwa kwa mshindi wa kwanza hadi watano.

Kishk amesema mashindao ya mwaka huu yatashirikisha washiriki 23 kutoka nchi 21 za Bara la Afrika.

"Mashindano ya mwaka huu yatafanyika April 25 katika Uwanja wa Banjamin  Mkapa ambapo mshindi wa kwanza akiwa Mtanzania PBZ itatoa nyumba yenye thamani ya shilingi milioni 40.

Ila sisi kama waandaji tumetenga shilingi milioni 20 kwa mshindi wa kwanza iwapo hatakuwa  Mtanzania," amesema.

Mkurugenzi huyo ametaja baadhi ya nchi ambazo zitakuwa na washiriki ni pamoja na Tanzania, Zanzibar, Kenya, Uganda, DRC Congo, Senegali, Afrika Kusini na Burundi.

Aidha amesema mgeni rasmi anatarajiwa kuwa Rais wa Zanzibar, Dk.A

Hussein Mwinyi na Mgeni Maalum atakuwa Waziri Mkuu Kassim Majaliwa.

Sheikh Kishk amewataka Watanzania kujitokeza kwa wingi kwenye mashindao hayo ambayo yamekuwa na mafanikio makubwa kwa miaka 20 iliyopita.

Kwa upande wake Mkuu wa Wilaya ya Temeke, Godwin Gondwe ameipongeza Taasisi ya Al-Hikma kwa kuandaa mashindano hayo ambayo yanachangia kujenga jamii yenye kumcha Mungu na nidhamu.

Gondwe amesema wilaya itatoa ushirikiano wa hali ya juu kuhakikisha mashindani  hayo yanafanyika kwa usalama na mafanikio.

"Nawapongeza Al-Hikma kwa kuandaa mashindao haya kwani yamekuwa na matokeo chanya tangu yaanze. Naomba washiriki wa Tanzania mjitahidi kubakiza ushindi hapa," amesema.

Aidha, Mkuu wa Wilaya Gondwe amewataka wafanyabiashara kuacha tabia ya kuongeza bei ya bidhaa katika kipindi hiki cha Mwezi Mtukufu wa Ramadhani.