NMB Mdhamini Mkuu Zanzibar Sea Food Festival 2021

Meneja wa NMB Kanda ya Dar es Salaam na Zanzibar, Donatus Richard, akizungumza wakati wa uzinduzi wa Tamasha la Vyakula na Rasirimali za Baharini (Zanzibar Sea Food Festival 2021), uliofanyika leo Septemba 8, 2021 jijini Zanzibar jana. Benki ya NMB ni wadhamini wakuu wa tamasha hilo litakalofanyika Oktoba 8-9. Kushoto ni Mkuu wa Mkoa wa Kaskazini Unguja, Ayoub Mohammed Mahmoud na kulia ni Meneja Msimamizi wa Biashara NMB Zanzibar, Abdallah Duchi. (Na Mpiga Picha Wetu).  

Mkuu wa Mkoa wa Kaskazini Unguja, Ayoub Mohammed Mahmoud (kushoto) akionesha eneo litakalofanyika Tamasha la Vyakula na Rasirimali za Baharini (Zanzibar Sea Food Festival 2021),  wakati wa uzinduzi wa tamasha hilo litakalofanyika Oktoba 8-9. Wa pili kushoto ni Meneja wa NMB Kanda ya Dar es Salaam na Zanzibar, Donatus Richard na wa pili kulia ni Meneja Msimamizi wa Biashara NMB Zanzibar, Abdallah Duchi. 

 

Mkuu wa Mkoa wa Kaskazini Unguja, Ayoub Mohammed Mahmoud (wa tatu kushoto), akiteta jambo na Meneja wa NMB Kanda ya Dar es Salaam na Zanzibar, Donatus Richard, wakati wa uzinduzi wa Tamasha la Vyakula na Rasirimali za Baharini (Zanzibar Sea Food Festival 2021) litakalofanyika Oktoba 8-9.  

 

NA MWANDISHI WETU

BENKI ya NMB imetangazwa kuwa Mdhamini Mkuu wa Tamasha la Rasirimali na Vyakula vya Baharini Visiwa vya Zanzibar (Zanzibar Sea Food Festival 2021), linaloratibiwa na Serikali ya Mapinduzi ya Zanzibar (SMZ), kupitia Ofisi ya Mkuu wa Mkoa wa Kaskazini Unguja.

Uzinduzi wa Tamasha hilo umefanyika visiwazi Zanzibar leo, ambapo linatarajia kuunguruma kwa siku mbili mfululizo hapo Oktoba 8 na 9 mwaka huu, katika Fukwe za Kendwa, likiwakutanisha pamoja wasanii wa kitaifa na kimataifa na wahudhuriaji zaidi ya 30,000, chini ya kaulimbiu: 'Kamata Mshipi, Vumba ni Fursa.'

Akizungumza wakati wa uzinduzi huo, Meneja wa NMB Kanda ya Dar es Salaam na Zanzibar, Donatus Richard, alisema Beni yake inathamini jitihada za SMZ za kuimarisha Uchumi wa Bluu na kwamba dhamira ya dhati ya kuunga mkono jitihada hizo zimewachochea kukubali kudhamini tamasha hilo linaloenda kuongeza thamani ya utalii visiwani humo.

"Tunashukuru sana kwa fursa hii adhimu ya kuwa wadhamini wakuu wa tamasha hili la Rasirimali na Vyakula vya Baharini, hii ni kwa sababu NMB inathamini sana Sekta ya Utalii nchini. Na kwa kuthibitisha hilo, tumejikita zaidi kusaidia harakati za za kufikia Uchumi wa Bluu, ambazo ziko chini ya Serikali ya Zanzibar.

"Kwa kuelewa umuhimu huo, wenyeji wetu ambao ni Ofisi ya Mkuu wa Mkoa wa Kaskazini Unguja, ilipotuomba kudhamini, hatukusita kukubali, tukitambua kuwa utalii unachangia uchumi, pamoja na asilimia 80 ya pesa za kigeni katika hazina ya Serikali," alisisitiza Donatus.

Aliongeza kuwa, wanaamini Zanzibar Sea Food Festival lina umuhimu mkubwa katika kukuza utalii na kuchangia pato la taifa na wao kama wadau wa maendeleo, wanajisikia fahari kuwa sehemu ya mafanikio ya ukuzaji uchumi na kwamba wamejipanga vya kutosha kutumia kila fursa ya kusaidia mchakato huo.

Akilitambulisha tamasha hilo, Mkuu wa Mkoa wa Kaskazini Unguja, Ayoub Mohammed Mahmoud, alisema Zanzibar Sea Food Festival limebuniwa kwa lengo la kusapoti juhudi za utekelezaji wa Sera za Serikali ya Zanzibar chini ya uongozi wa Rais Dk. Hussein Ali Mwinyi.

Aliyataja makundi yatakayoshiriki tamasha hilo kuwa ni pamoja na wavuvi, watalii, wasanii, wawekezaji, watembeza wageni, taasisi za fedha, mashirika ya Teknolojia ya Habari, Mawasiliano, Kampuni za vinywaji, hoteli za kitalii, mikahawa na wananchi wa kada zote visiwani humo na Tanzania kwa ujumla.

"Faida mbalimbali zinatarajiwa kupitia tamasha hili, ambazo zitasaidia jamii ya wana Kaskazini Unguja, kama vile mauzo ya samaki na mazao ya bahari takribani tani 30, sanjari na kuwakutanisha na kuwaunganisha kibiashara wavuvi wasiopungua 10,000 na wawekezaji wa hoteli za kitalii wasiopungua 127.

"Pia faida nyingine zitokanazo na tamasha hilo ni ujenzi na ukarabati wa vyumba vya madarasa visivyopungua  150, ajira za muda 16,322, ujenzi wa barabara ya lami kilomita 2.5, maonesho ya kazi za wavuvi na wajasiriamali, pamoja na kazi mbalimbali za uhifadhi wa mazingira," alibainisha Mahmoud.

Aliongeza kuwa, tamasha hilo ambalo waratibu wenza ni pamoja na Clouds Media, Kampuni za STR8UP Vibes na Zan Ocean, litapambwa na burudani kutoka kwa wasanii wa kitaifa na kimataifa takribani 30, wakiwemo FireBoy wa Nigeria, Focalist na DJ Obza wa Afrika Kusini, na wakali mbalimbali kutoka Tanzania Bara na Zanzibar.