Nipe Fagio yaihasa serikali kusaini ahadi ya kimataifa ya methane ili kukabiliana na mabadiliko ya hali ya hewa

Dar es Salaam - Tanzania: Serikali ya Jamhuri ya Muungano wa Tanzania imetakiwa kuungana na zaidi ya nchi 110 kutia saini ahadi ya Kimataifa ya Methane katika hatua ya kukabiliana na mabadiliko ya tabianchi. 

Kwa mujibu wa taarifa iliyotolewa jana na Nipe Fagio, asasi isiyo ya kiserikali kutoka Tanzania inayokusanya takwimu za kusaidia watoa maamuzi juu ya kuandaa sera ya vikwazo vya uzalishaji wa plastiki na taasisi inayotekeleza mfumo wa Taka Sifuri nchini Tanzania, ili kuwezesha mabadiliko ya kimfumo, Ahadi ya Kimataifa ya Methane ni makubaliano ya pamoja. na Umoja wa Ulaya na Marekani kupunguza uzalishaji wa methane duniani kwa asilimia 30 ifikapo 2030.

Katika taarifa hiyo, Ana Le Rocha, Mkurugenzi Mtendaji wa Nipe Fagio alisema Ahadi ya Kimataifa ya Methane ni hatua muhimu katika kukabiliana na mabadiliko ya hali ya hewa na kuleta dunia karibu na malengo ya Mkataba wa Paris wa kuweka joto la dunia hadi chini ya 2°C.

"Ahadi ya Kimataifa ya Methane ni hatua kubwa ambayo itasaidia kupunguza uzalishaji wa methane duniani kwa asilimia 30 ifikapo 2030," Ana alisema. Aliongeza: "Kwa hivyo, tunaiomba serikali yetu kuungana na nchi 110 kuunga mkono makubaliano ya kukabiliana na janga la mabadiliko ya hali ya hewa nchini na duniani kote."

Methane ni gesi chafu yenye nguvu mara kumi zaidi ya kaboni dioksaidi katika kuongeza joto la hali ya hewa. Ni kichafuzi cha hali ya hewa cha muda mfupi kinachoweza kuishi kwenye hewa kwa zaidi ya takriban muongo mmoja.

Utafiti wa jopo la wataalam kutoka serikali mbali mbali kuhusu Mabadiliko ya Tabianchi (IPCC) unaonyesha kuwa methane inawajibika kwa angalau robo ya ongezeko la sasa la joto duniani na kupunguza methane inayosababishwa na binadamu, ambayo inachangia zaidi ya nusu ya uzalishaji wote wa methane, ni mojawapo ya njia bora zaidi za kupambana na mabadiliko ya tabianchi.

Methane itokanayo na shughuli za binadamu iko katika nyanja kuu tatu: kilimo (asilimia 40), nishati (asilimia 35) na taka (asilimia 20). Kilimo cha mifugo ni sababu kuu ya methane katika sekta ya kilimo. Katika sekta ya nishati, uchimbaji wa mafuta na gesi, usindikaji na usambazaji huchangia asilimia 23, na uchimbaji wa makaa ya mawe huchangia asilimia 12 ya uzalishaji.

"Pamoja na ripoti mpya ya hivi majuzi iliyotolewa kwa pamoja na Global Alliance for Incinerator Alternatives (GAIA), Changing Markets Foundation, na Wakala wa Uchunguzi wa Mazingira (EIA), ni rahisi na inawezekana kwa serikali yetu kupunguza uzalishaji wa methane," alibainisha.

Alibainisha kuwa ripoti inaangazia kwamba kwa kukabiliana na sekta ya taka, serikali zitapata matokeo ya haraka kwa kutumia baadhi ya mikakati rahisi na nafuu zaidi ya kupunguza methane inayopatikana. Uzuiaji wa taka, utenganishaji kutoka kwenye vyanzo vya utupaji wa taka za kikaboni, na mbinu zingine zinaweza kupunguza uzalishaji wa taka ngumu wa methane kwa hadi asilimia 95 ifikapo 2030.

"Ripoti hii inaonyesha kuwa sisi tukiwa kama watekelezaji wa mifumo ya taka sifuri nchini Tanzania, tuko kwenye njia sahihi kwani inaangazia kwamba hatua zinazoweza kuchukuliwa ili kupunguza uzalishaji wa methane ni pamoja na kutenganisha taka kutoka kwenye vyanzo vyake kupitia mfumo wetu wa taka sifuri wa kijamii zaidi. Mfano, utenganishaji wa taka unafanywa kwenye chanzo kabla ya kupelekwa kwenye Kituo cha Urejeleshaji Taka (MRF). Hii inasaidia kupunguza uzalishaji wa taka ngumu za methane kwa asilimia kubwa,” alihitimisha.