KASI NDOGO UJENZI WA TANGI LA MAJI YAMKERA KATIBU MKUU-ZANZIBAR

 

Na Talib Ussi,  Zanzibar

 

Katibu Mkuu Wizara ya Maji, Nishati na Madini Zanzibar Joseph Kilangi  ameahidi kusitisha  mkataba na Kampuni ya Simba Developa inayojenga mradi wa tangi la Kuhifadhia Maji Safi na Salama  eneo la Mgeni Haji Wilaya ya Maghari A Unguja, kwa kutoridhishwa  na utendaji kazi wa kampuni hiyo.

Aliyasema hayo wakati alipofanya ziara yake ya kiutendaji ya kukagua miradi ya Maji Safi na Salama inayotekelezwa na kampuni mbalimbali ikiwemo  kampuni ya Afcon,  Simba Developa na Shanjo.

 

Alisema utekelezaji wa kampuni hiyo (Simba Developa) haujafikia hata asilimia 30 ya ufanyaji kazi, hivyo endapo ujenzi huo utaendelea kudorora, atashauriana na mwasheria wa wizara yake ili kuandaa utaratibu wa kusitisha mkataba  pamoja na kuwatoza fidia kampuni hiyo.

“Mradi wa ujenzi la tangi ni mradi wa miezi minane lakini hadi sasa miezi minne imepita wamechimba shimo na kufunga nondoo chini basi! hakuna kazi inayoendelea hatuwezi kuendelea na kampuni hiyo, nitakaa na mwasheria kuangalia namna ya kuvunja mkataba na kuwatoza faini wailipe serikali kwasababu wameshatupoteza muda, serikali haitoweza kufanya nao kazi tena” Alisema Kilangi

Alisema hatua ya kukatisha mkataba itafanyika kwa kampuni zote ambazo zitashindwa kutimiza ahadi kama waliyokubaliana, na kila kampuni ina muda waliyokubaliana katika kutekeleza mradi, hivyo hakuna kuongeza muda.

Alielezea Mradi wa Maji unayotekelezwa na kampuni ya Afcon kupitia fedha za Exim Benki ambapo ni mkopo nafuu wa dola milioni 92.18 unajukumu la kuchimba visima, kujenga matangi ya kuhifadhia maji, kufukia maboba pamoja kujenga nyumba ya kuhifadhi Maji (Maji House) unaendelea vizuri.

Katika hatua nyengine Katibu Mkuu huyo alitembeleza kisima cha Maji katika Kijiji cha Bumbwisudi ambapo ameridhishwa na utekelezaji wa kisima hicho, nakusema kwamba kisima hicho kitapoanza kutumika tatizo la maji litakua historia kwa mji wa Zanzibar.

Alisema kisima hicho kinauwezo wa kusukuma maji lita laki mbili na hamsini (250,000) kwa muda wa saa moja kwa mujibu wa wataalam ambapo maji hayo yatapelekwa katika tangi la Welezo na kusambaza Wilaya ya Mjini Unguja.

Kilangi pia alitembelea mradi wa maji unaotekelezwa na kampuni ya Shanjo kupitia fedha za ahuweni za UVIKO-19 katika Shehia ya Mbuzini Wilaya Magharibi ‘A” wenye thamani ya dola bilionii 34.2 ambapo ameridhishwa na utekelezaji wake na kuwasisitiza wataalam kuongeza kasi ya utendaji.

Naye Meneja Mradi  bw. Rashid Mohamed kutoka Mamlaka ya Maji Zanzibar (ZAWA), alisema mradi wa kisima kupitia fedha za ahuweni za UVIKO-19 unajukumu la kujenga matangi 10 kwa Unguja na Pemba, kuchimaba visima vipya 38 pamoja kufanya kazi ya kutandika  mabomba.

Alisema mara tu vifaa vitakapoingia nchini Julai 15, mwaka huu hakuna sababu ya kuchelewesha kazi kwasababu timu ya wataalum iko imara kiutendaji.

Kwa upande wake Mhandisi Hassan Khamis Hassan ambae ni Mkurugenzi ZAWA, alisema Kisima cha Bubwisudi hakina tatizo kimefungwa  mashine kubwa ya kusukumia maji ila wanahitaji usalama wa mashine hiyo na wameshafanya utaratibu wa kuwaomba ZECO wasaidie kifaa hicho cha usalama wa mashine (mota).

Mapema Mhadisi wa kampuni ya Simba Develop Hassan Hamad, alisema utekelezajwi wa mradi wa tangi la maji kupitia kampuni hiyo unatokana na mshauri elekezi ambapo alifelisha kokoto zilizoagizwa mwanzo kutona na ardhi ya hapo ina maji maji isingeweza kukidhi vigezo vilivyohitajika lakini  tayari wameshaagiza kokoto zinanostahiki na kuendelea na kazi.

Ziara ya katibu Mkuu Kilangi ni ziara ya siku mbili, ambapo siku ya kwanza alitembelea Mradi wa maji shehiya ya Masingini, Dimani, Nyumba ya kuhifadhia maji eneo la Miembeni ( Madema) ambapo shughuli hizo zinatekelezwa na fedha za Exim Benki.

 Pia alitembea mradi wa maji Mbuzini unaotekelezwa kwa fedha za ahuweni za UVIKO-19 na mradi wa ujenzi wa tangi la kuhifadhia maji Mgeni haji linalojengwa na kampuni ya Simba Developa.