Mikoa 15 yatarajia mvua kubwa

Na Irene Mark

MKIOA 15 Tanzania inatarajiwa kupata mvua kubwa kuanzia leo Machi14 na kesho Machi 15,2023.

Mikoa hiyo ni Mbeya, Iringa, Songwe, Njombe, Rukwa, Katavi, Tabora, Kigoma, Singida, Dodoma, Ruvuma Mara, Simiyu, Shinyanga na Mwanza.

Taarifa ya angalizo la mvua hiyo imetolewa leo Machi 13,2023 na Mamlaka ya Hali ya Hewa Tanzania (TMA) na kuonesha kwamba mvua hiyo itanyesha kwa siku mbili mfululizo.

“Mvua hizo pia zinatarajiwa kunyesha Machi 15,2023 kwenye baadhi maeneo ya mikoa ya Mara, Simiyu, Shinyanga na Mwanza.

“Zipo athari zinazoweza kujitokeza katika kipindi hicho hivyo ni vema wakazi wa maeneo husika kuchukua tahadhari mapema,” ilisomeka sehemu ya taarifa hiyo.

Hata hivyo TMA inawashauri wananchi kuendelea kufuatilia taarifa za hali ya hewa za kila siku ili kujua nini kitatokea wapi na lini.