BLAD KEY ATAMBULISHA WIMBO WAKE

Na Elizabeth John

MSANII wa muziki wa kizazi kipya nchini, Juma Awadhi ‘Blad Key’ juzi ameutambulisha wimbo wake mpya unaokwenda kwa jina ‘Mapenzi’.

Akizungumza na Tanzania Daima jijini Dar es Salaam, Blad Key alisema ameamua kuutambulisha wimbo huo katika hafla ya kuitambulisha timu ya taifa ya Tanzania ‘Kilimanjaro Stars’ baada ya kuona kwamba itapokelewa vizuri na mashabiki wake.

“Unajua penye miti mingi hapakosi wajenzi, niliamua kuutambulisha wimbo huo katika umati mkubwa wa watu nikijua lazima utakubalika katika jamii,” alisema Blad Key.

Alisema anawaomba mashabiki wa muziki wa kizazi kipya nchini waendelee kumpa sapoti katika kazi zake kwani kuna vitu vingi vizuri ambavyo amewaandalia.

“Nipo katika hatua za mwisho za uandaaji wa video ya kazi hiyo ambayo naamini baada ya sikukuu ya Christimas itakua tayari naomba wapenzi wangu wasicheze mbali na mimi,” alisema Blad Key.

Blad Key alishawahi kutamba na vibao vyake kama, Vimepanda bei, Mlegezo, Jipange na nyinginezo ambazo zilimtambulisha na kufanya vizuri katika vituo mbalimbali vya redio.