LUIS NANI AIPELEKA MAN UTD ROBO FAINALI FA

MANCHESTER, England

“Nimeridhishwa na aina ya ubora tulioonesha mchezoni. Tutakuwa nyumbani katika raundi ijayo na tunajipanga kumvaa na kumng’oa yeyote atakayeumana nasi katika hatua hiyo”

WINGA machachari Luis Nani alifunga bao moja na kuchangia la pili kuiwezesha Manchester United kuicha Reading kwa mabao 2-1 na kujikatia tiketi ya robo fainali ya Kombe la FA – mechi iliyopigwa kwenye Uwanja wa Old Trafford jana usiku.

Nani, alikuwa mtokea benchi pekee kutokana na kuumia kipindi cha kwanza kwa beki Phil Jones, lakini alifanya kazi kubwa kuipa mabao hayo mawili United katika kipindi cha pili, akifunga moja - kabla ya krosi yake kuunganishwa na Chicharito kuipa ushindi muhimu.

Kwa ushindi huo, United sasa itaumana na mshindi wa mechi kati ya Chelsea na Middlesbrough katia hatua ya robo fainali ya michuano hiyo, kuwania nafasi ya kutwaa mataji matatu waliyonayo Mashetani Wekundu.

“Nimeridhishwa na aina ya ubora tulioonesha mchezoni,” alisema Ferguson, ambaye alikifanyia mabadiliko manane kikosi chake kilichotoka sare ya bao 1-1 dhidi ya Real Madrid wiki iliyopita katika mechi ya kwanza mtoano wa 16 bora mabingwa Ulaya.

“Wakati unapokuwa mbele kwa mabao 2-0 hupaswi kujisahau. Nani anastahili kuwa Mchezaji Bora wa Mechi ‘man of the match’, mchango wake ulikuwa mkubwa. Nilihisi ungetuwezesha kushinda mechi.

“Tutakuwa nyumbani katika raundi ijayo na tunajipanga kumvaa na kumng’oa yeyote atakayeumana nasi katika hatua hiyo."

……The Sun/SuperSport.com …..