Heineken kuwapeleka wakali wa Foosball Uholanzi

 Uche Unigwe Meneja Mkazi wa Heineken Tanzania akizungumza katika hafla hiyo.

 Meneja Biashara, Masoko wa Heineken Tanzania, Caroline Kakwezi akizungumza wakati wa uzinduzi huo. 

Mkurugenzi wa Idara ya Maendeleo ya Michezo Wizara ya Habari Utamaduni na Michezo, Leonard Thadeo akizindua mashindano ya mchezo wa Foosball jijini Dar es Salaam.

Na Mwandishi Wetu

WADHAMINI wa Ligi ya Mabingwa Ulaya ‘Eufa Champion League’ imezindua michuano ya mchezo mpya wa Foosball kwa mashabiki wa ligi hiyo, ambako washindi watajikatia tiketi ya kusafiri nchini Uholanzi.

Akizungumza katika hafla ya uzinduzi wa michuano hiyo katika Mgahawa wa Akem jijini Dar es Salaam jana, Meneja wa Heineken Tanzania, Uche Unigwe, alisema, michuano hiyo itawashirikisha wateja wake hapa nchini, ikielekea kwenye harakati za mwisho za wa msimu wa Ligi ya Mabingwa Ulaya 2012/2013.

“Foosball, ni mchezo ambao kwa wengine unajulikana kama ‘mpira wa mezani’, ni mchezo unaochezwa duniani kote, ingawa mara nyingi zaidi ni kwenye baa na historia inaanzia mwaka 1923. Katika mchezo huu wapinzani wanasimama pande zote za meza na wanajaribu kufunga magoli,” alisema Unigwe.

Wanajaribu kuipiga mipira, ambayo inaanzishwa kutoka ng’ambo nyingine ya meza, wakitumia fimbo zilizotengenezwa na aluminium iliyounganishwa na sanamu za wachezaji wa mipira. Mshindi anapatikana kwa kufunga magoli mengi zaidi, kwa kawaida huwa kuanzia matano, 10 au 11.

Alisema, mashindano hayo yatafanyika katika mikoa mitatu ya Dar es Salaam, ambako kutakuwa na baada ya 12, Arusha na Mwanza kutakakokuwa na baa mbilimbili na kushirikisha wateja wa bia ya Heineken.

“Michuano ya Foosball ni ya kusisimua na itatengeneza tukio la kihistoria, ambapo wale watakaofikia fainali watashindanishwa wakati wa mechi ya Ligi ya Mabingwa Ulaya, ikioneshwa ‘live’ Mei 25 Dar es Salaam na watakaobuka mabingwa watashinda safari ya kutembelea makao makuu ya Heineken jijini Amsterdam Uholanzi, wakilipiwa gharama zote,” alisema.

Naye Mkurugenzi wa Heineken Afrika Mashariki, Koen Morshuis, alisema; “Heineken inajitoa kuwapa wateja wetu wa Afrika Mashariki tukio la kipekee kama ilivyokuwa katika ziara ya Kombe la Ligi ya Mabingwa Ulaya 2012. Mwaka huu michuano ya Foosbal inalenga kuwapa changamoto wateja wetu kuonyesha ujuzi na vipaji vyao,”.