KUMEKUCHA MASHINDANO YA RIADHA YA VIJANA

Na Elizabeth John

SHIRIKISHO la Riadha Tanzania (RT) limesema maandalizi ya mashindano ya vijana ya kanda ‘Eastern Regional Jr Championship’ yanaendelea vizuri baada ya kuwa na uhakika wa kuendesha mashindano hayo ambayo yamepangwa kufanyika Jumamosi jijini Arusha.

Awali mashindano hayo yalipangwa kufanyika kisiwani Zanzibar na baadae kuhamishia jijini Dar es Salaam kabla ya kupelekwa jijini Arusha.

Akizungumza jijini Dar es Salaam, Katibu mkuu wa RT, Suleiman Nyambui alisema nchi zinazoshiriki mashindano hayo zimeanza kuwasili nchini kuanzia jana.

“Nchi nane zimethibitisha kushiriki mashindani hayo, bado Ethiopia na Somalia hazijathibitisha, nchi zimeshaanza kufika jijini hapo kama Rwanda imefika leo (jana) na zingine tunatarajia kuendele kuzipokea muda wowote,” alisema.

Nchi ambazo zitashiriki mashindano hayo ni Kenya, Uganda, Somalia, Misri, Eritrea, Ethiopia, Djibouti, Sudan, Zanzibar na wenyeji Tanzania.