MADEE AISAMBAZA ALBAMU YA 'INNOCENT'

Na Elizabeth John

KIONGOZI wa kundi la Tip Top Connection lenye maskani yake Manzese jijini Dar es Salaam, Ahmed Ally ‘Madee’, ameachia albamu yake mpya  inayojulikana kwa jina la ‘Innocent’ ambayo ni zawadi kwa wakazi wa Manzese, jijini Dar es Salaam.

Albamu hiyo, anayoigawa bure kwa wakazi wa Manzese, ina nyimbo 19, ambazo ameimba mwenyewe na kwamba itakuwa nje ya mfululizo wa albamu zake za kawaida.

Akizungumza jijini Dar es Salaam, Madee alisema kazi hiyo ameikamilisha wiki hii na kwamba yuko katika hatua za mwisho za uandaaji kwaajili ya usambazaji na anaamini atawafurahisha mashabiki na wapenzi wake.

“Nimekuwa nikipata malalamiko kutoka kwa mashabiki wangu wa mtaani kwamba sijawahi kuwapa zawadi na wengine wanasema hawazioni albamu zangu, nimeona nitoe zawadi kwa wapenzi wangu, naomba waendelee kuniombea ili nizidi kuwapa vitu vya uhakika,” alisema Madee.

Mbali na kuandaa albamu hiyo, Madee alisema yuko kwenye mchakato wa kuachia kibao chake kipya kinachokwenda kwa jina la ‘Manzese Kwanza Kwenu Baadaye’ ambacho anaamini kitafanya vizuri kutokana na kusimama kwa mashairi yake.