NIGERIA YAIFYATUA TAHITI 6-1 KOMBE LA MABARA 2013

 John Obi Mikel wa Nigeria (kushoto), akimtoka kiungo wa Taihiti katika mechi ya ufunguzi Kundi B la michuano ya Kombe la Mabara 2013. Katika mechi hiyo, Nigeria ilishinda mabao 6-1 na kuongoza kundi hilo linalojumuisha timu za Hispania na Uruguay.

 Mfungaji wa mabao matatu 'hat-trick' Nnamdi Oduamadi, akimlamba chenga kipa wa Tahiti kuifungia Nigeria moja ya mabao hayo.

 Wachezaji wa Nigeria wakimpongeza Oduamadi (wa pili kushoto) baada ya kufunga bao.

 Ahmed Mussa wa Nigeria, akimpongeza Oduamadi baada ya kufunga bao.

Mshambuliaji Jonathan Tehau wa Tahiti, akipiga kichwa kufunga bao la kihistoria kwa nchi yake, wakati kikosi chake kilipolala kwa mabao 6-1 mbele ya Nigeria. Bao hilo ndio la kwanza kwa nchi hiyo kufungwa katika michuano ya kimataifa.

 Wachezaji wa Tahiti wakishangilia bao la kihistoria katika mechi hiyo.

Wachezaji hao wakishangilia na kuwashukuru mashabiki waliojazana dimbani kwa kuwasapoti licha ya uchanga wao katika tasnia ya soka duniani.

RIO DE JANEIRO, Brazil

Kulikuwa na mashabiki 20,187 tu ndani ya dimba lililokarabatiwa la Estadio Mineirao, lakini wengi kama si wote walionekana kuisapoti Tahiti - nchi changa katika soka la kimataifa, ambayo nyota wake walijikusanya na kushangilia mwisho wa mchezo

MABAO matatu ‘hat-trick’ yaliyowekwa kimiani na mshambuliaji Nnamdi Oduamadi, jana usiku yaliwawezesha Nigeria kuanza vema mechi za michuano ya Kombe la Mabara kwa kuichapa Tahiti mabao 6-1 kwenye dimbala Belo Horizonte.

Mabingwa hao wa Afrika waliwasili Brazil saa 36 kabla ya kuingia dimbani katika mechi hiyo, lakini hiyo haikuwazuia kukaa kileleni katika kundi B linalowahusisha mabingwa wa Dunia Hispania – ambao pia walishinda kwa mabao 2-1 dhidi ya Uruguay.

Ushindi huo wa Nigeria ulikuwa adhabu kubwa mno kwa Tahiti, inayokamata nafasi ya 138 katiika viwango vya ubora duniani, lakini hakikuwafanya kutoshangilia bao lao kwanza katika la kimataifa kwa nchi hiyo, lililofungwa kwa kichwa na Jonathan Tehau.

Bao la Tehau mapema kipindi cha pili, lilikuja wakati ambao Nigeria ilikuwa mbele kwa mabao 3-0, baada ya Elderson Echiejile kufunga la kuongoza dakika ya tano na mawili ya Oduamadi katika dakika za 10 na 26.

Hata hivyo, Tehau akatibua sherehe yake robo saa baadaye, kwa kujifunga kunako dakika ya 69, kabla ya Oduamadi na Echiejile kufunga kunako dakika za 76 na 81 kukipa kikosi cha kocha Stephen Keshi ushindi muhimu kuelekea mechi ya Ijumaa dhidi ya Uruguay.

Kulikuwa na mashabiki 20,187 tu ndani ya dimba lililokarabatiwa la Estadio Mineirao, lakini wengi kama si wote walionekana kuisapoti Tahiti - nchi changa katika soka la kimataifa, ambayo nyota wake walijikusanya na kushangilia mwisho wa mchezo.

Supersport.com