'USIKU WA NANI KAMA MAMA' WAPIGA HODI MIKOANI

NA ELIZABETH JOHN

BAADA ya kutikisa jiji la Dar es Salaam na shoo yake ya ‘Usiku wa Nani Kama Mama’, msanii wa muziki wa dansi, Christian Bella anatarajia kuanza ziara yake mikoani ili kuwafikishia mashabiki wake waliko huko burudani iliyomo ndani ya kibao hicho na nyinginezo.

Akizungumza na Habari Mseto jijini Dar es Salaam jana, Bella alisema Septemba 26 atakuwa katika Ukumbi wa Buzuruga Plaza jijini Mwanza na Septemba 27, atakuwa Royal Village mjini Dodoma.

Alisema, katika shoo hizo ambazo zitaanza saa tatu usiku na kuendelea, atasindikizwa na Bendi ya Malaika, huku kiingilio kikiwa ni sh. 10,000 kwa viti vya kawaida na 20,000 kwa VIP.

“Nimeamua kuzunguka mikoani kutokana na kutambua umuhimu wa mashabiki wangu, wengi wamekuwa wakinishauri na kuniomba nifanye hivyo baada ya wimbo wa ‘Nani Kama Mama’ kupokewa vizuri sokoni naomba wadau wa mikoni wajiandae kwa burudani hiyo,” alisema.

Bella alisema kwa kuanzia anaanza na mikoa hiyo miwili baada ya hapo itafuata mingine kwamba ana mpango wa kuzunguka nchi nzima ili kutoa burudani kwa wapenzi wake ambao wana kiu na ngoma hiyo.

Kupitia wimbo huo ambao Bella ameshirikiana vema na msanii wa muziki wa kizazi kipya nchini, Omary Nyembo ‘Ommy Dimpoz’ wamejizolea umaarufu mkubwa kutokana na ubora wa mashairi yaliyopo ndani yake.