Mikoa vikumbo kufikiwa Tamasha la Pasaka 2016

WAPENZI na mashabiki wa muziki wa injili wa baadhi ya mikoa wameanza kupigana vikumbo kutaka kufikiwa na uhondo wa Tamasha la Pasaka ambalo limekuwa likifanyika kila mwaka kwa kiwango cha kimataifa nchini.

Tamasha hilo ambalo limekuwa likisambaa katika mikoa mbalimbali baada ya uzinduzi wake kufanyika jijini Dar es Salaam limekuwa likipambwa na waimbaji mahiri  wa kitaifa na kimataifa kwa lengo la kuutukuza ufalme wa Mungu na malengo mengine kibao. 

Mwenyekiti wa Kamati ya Maandalizi ya Tamasha la Pasaka, Alex Msama (pichani), anasema tayari ameanza pokea maombi kutoka kwa mashabiki wa muziki wa injili wa mkoa wa Morogoro, Mwanza, Mbeya, Dodoma wakitaka tamasha hilo lianzie kwao badala ya Dar es Salaam.

“Ingawa ni mapema mno, Kamati yangu inatarajia kufuatilia taratibu za Baraza la Sanaa la Taifa (Basata) ambazo ni pamoja na kibali cha kufanikisha Tamasha hilo linaloshirikisha waimbaji wa ndani na nje ya Tanzania,” alisema Msama.

Kwa upande wake Salum Ismail Hamad wa jijini Dar es Salaam, mmoja wa wadau wa Tamasha hilo amewasihi waratibu kutopeleka kwingine uzinduzi wake, badala yake ubaki katika jiji hilo kutokana na wingi wa mashabiki kabla ya kuhamia mikoani.

Naye Rukia Joseph wa Kimara, alisema Tamasha hilo lenye historia inayoanzia mwaka 2000, wanapaswa kuendeleza utaratibu wa kuanzia katika jiji la Dar es Salaam kabla ya kugeukia mikoani. 

Aidha, Michael Deogratius alisema angependa kuona Tamasha hilo la Pasaka lihamie mikoani badala ya kuanzia jijini Dar es Salaam kila mwaka ili kuleta usawa kwasababu huko nako kumekuwa na mwitikio mkubwa wa muziki wa injili.

Akifafanua kuhusu maoni yao ya wadau, Msama alisema ni mawazo mazuri kuyapata kipindi hiki ambapo maandalizi rasmi bado hayajaanza kwani kunawapa picha ya kitu gani wapenzi na mashabiki wanataka na wao wafanye nini kulingana na uwezo wao kifedha.

Tamasha la Pasaka ndilo tukio kongwe zaidi la muziki wa injili ambalo limekuwa likifanyika wakati wa sikukuu ya Pasaka tangu mwaka 2000 kwa lengo la kumtukuza Mungu na malengo mengine yakiwamo kupata fedha za kusaidia makundi maalumu katika jamii.