POLISI WAKAMATA PIKIPIKI 600

JESHI  Polisi  Kanda maalum ya Dar es Salaam limekamata pikipiki zaidi ya 600 katika mikoa ya Kipolisi ya Ilala ,Temeke na Kinondoni zikihusishwa na matukio mbalimbali ya uhalifu.

Akizungumza na waandishi wa habari jijini Dar es Salaam, Kamanda  wa Polisi  wa Kanda  hiyo, Simon Sirro alisema katika mkoa wa Temeke  zimekamatwa pikipiki 130 ambapo pikipiki 55 zimelipishwa faini na pikipiki 75 zimeshikiliwa vituoni kwa uchunguzi.

Alisema kwa mkoa wa Kinondoni pikipiki zilizokamatwa ni 241 ambapo pikipiki 90 zimetozwa faini pikipiki 10 zimeachiwa huru baada ya kujiridhisha  na pikipiki 141 zinashikiliwa kwa uchunguzi.

Alisema kwa mkoa wa Ilala zimekamatwa jumla ya pikipiki 249 ambapo jumla ya pikipiki 134 zimelipa faini pikipiki 19 zimeachiwa huru na pikipiki 95 zinashikiliwa kituoni kwa uchunguzi.

Sirro alisema kuhusu suala la uporaji kutumia pikipiki unaotokea katika maeneo mbalimbali ya  jiji hasa eneo la kibiashara la mlimani City hatua za makusudi  zimechukuliwa ikiwa ni pamoja na kufanya Oparesheni maalum eneo hilo na kuona namna nzuri ya kuondoa pikipiki maeneo hayo.

“Tumejipanga kuwasiliana na wamiliki wa taasisi za kifedha kujiridhisha kama waajiriwa katika taasisihizo wanaweza kuwa wahusika kwa njia moja au nyingine katika uhalifu huu unaohatarisha maisha ya wakazi wa Dar es Salaam.”Alisema Sirro.

Katika hatua nyingine Kamanda Sirro alisema Desemba 12 mwaka jana huko maaeneo ya Buguruni alikamatwa mtuhumiwa aitwaye Simba Said  (44) ambaye ni  mganga wa kienyeji mkazi wa vingunguti Koloni, alipohojiwa alikiri kuwafanyia dawa majambazi kabla ya kwenda kufanya matukio ya kijambazi.

Alisema mtuhumiwa huyo alisema walipanga kufanya tukio la ujambazi maeneo ya Buguruni ,Polisi waliweka mtego na walipotaka kuwakamata ,walisitukia mchezo na kuwarushia risasi ndipo jambazi mmoja alijeruhiwa kwa risasi na kupelekwa  Amana ambapo baadae alifariki dunia.

“Katika tukio  hilo majambazi wengine walifanikiwa kutoroka yakitumia pikipiki tatu,wakati ufuatiliaji ukiendelea zilipatikana taarifa kuwa majambazi hayo yamekimbilia maeneo ya Tabata na Polisi walifuatilia na kufanikiwa kukamata bunduki mbili aina ya Pump Action ambazo namba zake zimefutwa na zikiwa zimekatwa mitutu.

Aidha Sirro alisema Januari 7 mwaka huu huko Gongolamboto alikamatwa jambazi sugu aliyekuwa anatafutwa kwa muda mrefu aitwaye  Mkama Hassan (32) mkazi wa mbagala maji matutu na Gongolamboto ,alipopekuliwalea ili nyumbani kwake alikuwa na bastola aina ya Chinese iliyofutwa namba ikiwa na magazine yenye risasi 7 mahhojiano yanaendelea ili kuzalisha watuhumiwa wengine.