Nape mgeni rasmi Tamasha la Pasaka Kirumba Machi 27

NA MWANDISHI WETU

WAZIRI wa Habari, Utamaduni, Sanaa na Michezo, Nape Nnauye (pichani) amepewa heshima ya kuwa mgeni rasmi katika Tamasha la Pasaka litakalofanyika siku ya Machi 27 katika Uwanja wa CCM Kirumba, jijini Mwanza.

Mwenyekiti wa Kamati ya maaandalizi ya tamasha hilo, Alex Msama alisema kwamba Waziri Nape amepewa heshima hiyo sio tu kutokana na uhusiano uliopo kati ya wizara yake na tukio hilo, pia udau wake na masuala ya nyimbo za injili kwa asili.

Msama alisema tukio hilo litakaloanzia mkoani Geita hapo Machi 26, baada ya Uwanja wa Kirumba, jijini Mwanza, uhondo huo wa nyimbo za injili utahitimishwa  hapo Machi 28 katika mji wa Kahama.

Ametoa shukrani kwa Waziri Nape kukubali kubeba jukumu hilo akiamini pia wadau wa muziki wa injili watajitokeza katika tamasha hilo katika maeneo hayo matatu litakapofanyika kwa siku tofauti ambapo safari hii ni rasmi kwa Kanda ya Ziwa.

Alisema kamati yake inaendelea maandalizi ya kuelekea tamasha hilo ambalo litashirikisha waimbaji mbalimbali hapa nchini.

“Maandalizi kuelekea Tamasha la Pasaka yanaendelea vema, hivyo wakazi wa mikoa ya Kanda ya Ziwa wajiandae kupokea ujumbe wa neno la Mungu kupitia viongozi wa dini na waimbaji wa muziki wa Injili,” alisema Msama.

Msama alisema baadhi ya waimbaji  waliothibitisha kushiriki tamasha hilo wameanza kujiweka sawa  ambao ni malkia wa muziki wa injili, Rose Muhando, Bonny Mwaitege, Upendo Nkone na Jesca BM Honore.

Wengine ni  Christopher Mwahangila, Joshua Mlelwa, Sifael Mwabuka, Jenipher Mgendi, Kwaya ya AIC Makongoro ya Arusha na Kwaya ya Wakorintho Wapili ya Njombe.

Tamasha hilo ambalo limebena malengo kibao likiwemo la kupata fedha kwa ajili ya kusaidia makundi maalumu kama Yatiba, walemavu na wajane, kiingilio ni sh. 5,000 kwa wakubwa na kwa watoto shilingi 2000.