Wadau TCAA wajadili mpango usafiri wa anga

NA MWANDISHI WETU 

 

WADAU wa sekta ya Usafiri wa anga nchini wamekutana katika Ofisi za Makao Makuu ya Mamlaka ya Usafiri wa Anga nchini (TCAA) yaliyopo Banana-Ukonga, jijini Dar es Salaam kujadili rasimu ya mpango kamambe wa usafiri wa anga.

Katika Warsha  hiyo ya siku moja iliyowakutanisha wadau kutoka Wizara ya Ujenzi, Uchukuzi  na Mawasiliano, mashirika yanayotoa huduma za usafiri wa anga, Mamlaka ya Viwaja vya Ndege na mwenyeji Mamlaka ya Usafiri wa Anga, ilifunguliwa na Katibu Mkuu Wizara ya Ujenzi, Uchukuzi na Mawasiliano, Dk. Leonard Chamuriho.

Lengo la warsha hiyo ni kupata maoni ya wadau kuhusu rasimu hiyo ya mpango kamambe wa sekta ya usafiri wa anga  ambayo imetayarishwa na kampuni ya LEAPP ya Australia chini ya udhamini wa Benki ya Dunia.

Kampuni hiyo ilianza kuanda rasimu hiyo mwaka 2015 kazi ambayo imefanyika kwa miezi 12. 

Akizungumza  wakati wa ufunguzi huo, Dk. Chamuhiro alisema lengo la serikali ni kuwezesha Tanzania kutoa huduma za usafiri wa anga kwa viwango na taratibu zinazokubaliwa na Shirika la Kimataifa la Usafiri wa Anga Duniani (ICAO).

Alisema malengo mengine ni kuweka mazingira mazuri yatakayoruhusu  ushindani wa kibiashara katika sekta hii na kuongeza kua, sekta ya usafiri wa anga imekuwa ikikua siku hadi siku kutokana na juhudi mbalimbali.

Dk. Chamuhiro alisema, takwimu zinaonesha safari za ndege kwa sasa  zimeongezeka kwa asilimia 8  kwa mwaka 2015 ikilinganishwa na zile zilizofanyika mwaka 2014. 

Aidha, idadi ya abiria imekuwa ikikua kwa kiwago cha asilimia 1.5 hadi 2 kwa mwaka na lengo la warsha hiyo, ni kupata maoni ya wadau kuhusu rasimu hiyo ya mpango kamambe wa sekta ya usafiri wa anga nchini iliyotayarishwa na kampuni ya LEAPP ya Australia chini ya udhamini wa Benki ya Dunia.