NBTS YAKUSANYA ASILIMIA 60 YA DAMU

NA NEEMA MWAMPAMBA

MPANGO wa Damu Salama Tanzania (NBTS), umekusanya chupa za damu 43,880 sawa na asilimia 60 ya mahitaji kwa robo mwaka.

Akizungumza na Waandishi wa Habari jijini Dar es Salaam, Ofisa Mwendeshaji Mpango wa Damu Salama, Abdu Juma alisema katika kipindi cha Robo mwaka benki ya damu huhitaji chupa 75,000 ili kukidhi mahitaji.

Alisema licha ya kutofikia mahitaji kiasi kilichopatikana kwa muda huo ni sawa na asilimia 103 waliyojiwekea ambapo walitarajia kukusanya chupa 42,500.

Juma alisema katika robo mwaka ya Oktoba hadi Disemba 2015 mpango ulikusanya chupa za damu 11,760 sawa na ongezeko la chupa 32,120 kwa pindi cha Januari-Machi mwaka huu.

 “Katika kipindi hiki mikoa iliyoongoza kwa makusanyo ni Kigoma na Mara ambayo jumla ya chupa 7,580 sawa na asilimia 17 ya chupa zote zilizokusanywa”alisema Juma.

Pia alisema licha ya kufanikiwa kwa kiasi hicho bado kuna tatizo la mifuko ya kuhifadhia damu jambo linalowalazimu wananchi kununua mifuko kwa gharama zao pindi wanapohitaji kuchangia.

Alitaja changamoto nyingine kuwa ni mwitikio mdogo wa jamii kuhusu kuchangia damu kwa hiari kunakopelekea watu wachache kujitokeza kuchangia damu pamoja na halmashauri nyingi kutotenga bajeti ya kukusanya damu.

Pamoja na hayo alisema katika robo mwaka ya januari hadi juni na octoba-desemba huwa na mapungufu makubwa kutokana na wachangaji wakubwa ambao ni wanafunzi na wanavyuo kuwa likizo.

Hata hivyo ametoa wito kwa halmashauri zote kutenga bajeti ya kukusanya damu na kununua vifaa vya kukusanyia damu pia kuhamasisha wananchi kujitokeza kuchangia ili kuokoa  watu wanaopoteza maisha kwa kukosa damu.

Pia ameviomba vikundi mbalimbali katika jamii na madhehebu ya dini kushiriki katika shughuli hiyo kama vikundi vingine vilivyojitokeza na kufanikisha kiasi hicho.

“Nnaomba watu wajitokeze hali hii inaweza kumkuta mama yako, baba yako, mtoto wako au ndugu yako yeyote hivyo mjitokeze kuchangia damu tuokoe maisha ya ndugu zetu wanaofariki kwa upungufu wa damu kila kukicha”alisema Juma.