KATIBU MKUU-UTUMISHI AMWAGIZA MKUU WA CHUO CHA HOMBOLO KUWACHUKULIA HATUA ZA KINIDHAMU WATUMISHI WALIOSHIRIKI KULIPA MISHAHARA HEWA KWA ALIYEKUWA MTUMISHI WA CHUO HICHO

Katibu Mkuu, Ofisi ya Rais Menejimenti ya Utumishi wa Umma, Dkt. Laurean Ndumbaro akitoa maelekezo kwa Mkuu wa Chuo cha Serikali za Mitaa Hombolo, Dkt. Mpamila Madale alipofanya ziara ya kushtukiza katika chuo hicho jijini Dodoma.

 Mkurugenzi wa Idara ya Usimamizi wa Rasilimaliwatu katika Utumishi wa Umma Ofisi ya Rais, Menejimenti ya Utumishi wa Umma, Bw. Ibrahim Mahumi, akitoa ufafanuzi kuhusu taratibu za kiutumishi kwa Mkuu wa Chuo na baadhi ya watumishi wa Chuo cha Serikali za Mitaa Hombolo (hawapo pichani) wakati wa ziara ya kikazi chuoni hapo.

Katibu Mkuu, Ofisi ya Rais Menejimenti ya Utumishi wa Umma, Dkt. Laurean Ndumbaro akifuatilia maelezo ya Mkuu wa Chuo cha Serikali za Mitaa Hombolo, Dkt. Mpamila Madale alipofanya ziara ya kushtukiza katika chuo hicho jijini Dodoma.

Katibu Mkuu, Ofisi ya Rais, Menejimneti ya Utumishi wa Umma, Dkt. Laurean Ndumbaro, amemwagiza Mkuu wa Chuo cha Serikali za Mitaa Hombolo, Dkt. Mpamila Madale, kuwachukulia hatua za kinidhamu watumishi waliohusika kumlipa mishahara hewa kwa miezi 11 aliyekuwa Mhasibu Msaidizi wa Chuo hicho, Bw. Calvin Mushi na kumpa ruhusa ya kuhamia kituo kingine cha kazi bila idhini ya Katibu Mkuu Utumishi.

 

Dkt. Ndumbaro ametoa maagizo hayo leo baada ya kufanya ziara ya kikazi ya kushtukiza katika chuo hicho kwa lengo la kubaini sababu za kuendelea kumlipa mshahara mtumishi huyo.

Dkt. Ndumbaro amewataja watumishi wanaotakiwa kuchukuliwa hatua kuwa ni pamoja na Mkuu wa Idara ya Utumishi na Utawala wa Chuo hicho na Afisa Utumishi anayeshughulika na Mfumo Shirikishi wa Taarifa za Kiutumishi na Mishahara.

Dkt. Ndumbaro amefafanua kuwa, watumishi hao wamehusika kuiletea hasara serikali kwa kumlipa mshahara mtumishi asiyestahili Bw. Calvin Mushi ambaye amehamia Bohari Kuu ya Dawa (MSD) bila idhini ya mwenye mamlaka ambaye ni Katibu Mkuu Utumishi.

Aidha, Dkt. Ndumbaro amemwagiza Mkuu huyo wa Chuo kumfukuza kazi na kumfungulia mashtaka ya kinidhamu Bw. Calvin Mushi kwa kupokea mshahara katika vituo viwili vya kazi yaani Chuo cha Serikali za Mitaa Hombolo na Bohari Kuu ya Dawa (MSD) huku akijua kufanya hivyo ni kosa kisheria.

“Kwa kuzingatia Schedule A, Ndugu Calvin Mushi asimamishwe kazi na kufunguliwa mashtaka ya kinidhamu na fedha zote alizochukua zirejeshwe serikalini,” Dkt. Ndumbaro amesisitiza.

Dkt. Ndumbaro ametoa wito kwa watumishi wote wa umma nchini kufanya kazi kwa kuzingatia Sheria, Kanuni, Taratibu na Miongozo ya utumishi wa umma ili kuunga mkono jitihada za Serikali ya Awamu ya Tano za kuwaondoa watumishi hewa kwa lengo la kuokoa fedha za serikali ambazo zingetumika katika shughuli mbalimbali za maendeleo.

Ofisi ya Rais, Menejimenti ya Utumishi wa Umma na Utawa Bora inaendelea kutekeleza maelekezo ya Rais wa Jamhuri ya Muungano wa Tanzania kuhakikisha watumishi wa umma wanaolipwa mishahara wanakuwa na sifa stahiki kwa mujibu wa Sheria, Kanuni, Taratibu na Miongozo ya utumishi wa umma iliyopo.

KITENGO CHA MAWASILIANO SERIKALINI

OFISI YA RAIS (UTUMISHI)

 TAREHE 10 Septemba, 2018