MAAFISA MAENDELEO YA JAMII HACHENI KUFANYIA KAZI ZENU UANI JITOKEZENI SEBULENI-DKT. NDUGULILE

Katibu Mkuu wa Wizara ya Afya Maendeleo ya Jamii, Jinsia, Wazee, na Watoto Dkt. John Jingu akiongea na wataalamu wa Maendeleo ya Jamii wakati wa kufunga mkutano wao wa mwaka mkoani Arusha. Picha na Kitengo cha Mawasiliano WAMJW.

 Naibu Waziri wa Afya Maendeleo ya Jamii, Jinsia , Wazee, na Watoto Dkt. Faustine Ndugulile akiongea na Wataalam wa Maendeleo ya jamii wakati wa kufunga mkutano wao wa mwaka uliofanyika mkoani Arusha .

Naibu Waziri wa Afya Maendeleo ya Jamii, Jinsia , Wazee, na Watoto Dkt. Faustine Ndugulile akikabidhi ngao kwa mwakilishi wa Halmashauri ya Wilaya ya Songea Bi.Diana Mchonga baada ya Halmashauri yake kufanya vizuri katika mikopo inayotolewa na Mfuko wa Maendeleo ya Wanawake (WDF) wakati wa kufunga mkutano wa mwaka wa wataalam wa Maendeleo ya Jamii mkoani Arusha.

 Naibu Waziri wa Afya Maendeleo ya Jamii, Jinsia, Wazee, na Watoto Dkt. Faustine Ndugulile akipokea zawadi ya mpira wa miguu uliobuniwa na mmoja wa wajasiliamali unaotengenezwa kwa kutumia taka alipotembelea mabanda ya maonesho mara baada ya kufunga mkutano wa mwaka wa Watalaam wa Maendeleo ya Jamii mkoani  Arusha.

Na Anthony Ishengoma, Arusha

 

Naibu Waziri wa Afya, Maendeleo ya Jamii, Jinsia, Wazee na Watoto Dkt. Faustine Ndugulile ameagiza Wataalam wa Maendeleo Nchini kuacha kufanyia kazi uani nakuwataka kujitokeza sebuleni ili jamii ya Watanzania na Serikali waweze kutambua kazi wanazozifanya

Amesema hayo jana wakati wa hotuba yake ya kufunga Kongamano la kitaifa la Wataalam wa maendeleo ya jamii Nchini lililohitimishwa Mjini Arusha kwa lengo la kubadilishana uzoefu, mbinu na weledi ili kutekeleza majukumu ya kuhamasisha jamii kwa umahiri katika kufikia uchumi wa kati.

Aidha Dkt. Ndugulile aliongeza kuwa kazi ya wataalam wa maendeleo ya Jamii hazionekani hivyo anamwagiza Mkurugenzi wa Maendeleo ya Jamii kutoka Wizara yake Bw. Patrick Golwike kuandaa mwongozo utakaowawezesha wataalam hao kutekeleza majukumu yao ipasavyo.

‘’Najua mnatumika kama kiraka kwani katika maeneo yenu ya kazi mmekuwa mkiagizwa kufanya kila aina ya kazi kwani utasikia wanasema kuwa kazi hii acha tumshirikishe yule Afisa Maendeleo ya Jamii hii sisi kwetu kama Wizara lazima tuifanyie kazi’’. Alisema

Amewataka wataalam hao kuhakikisha wanawawezesha wajasiriamali wadogo wadogo Nchini wanaazisha viwanda vidogo vidogo na kuweka nembo za biashara yao kwa sababu bidhaa zinazotengenezwa na wajasiriamali hao zina ubora sawa na bidhaa zinazozalishwa na baadhi ya viwanda vikubwa.

‘’Ukitembelea na kujionea bidhaa za wajasiriamali utagundua zina ubora sana lakini kuna changamoto ya vifungashio kwani kuna wajasiriamali wanafunga bidhaa zao kwa kutumia chupa za maji au makasha ya bidhaa za wazalishaji wakubwa, hivyo ni kuendelea kutangaza bidhaa ya mzalishaji mkubwa’’. Aliongeza Naibu Waziri Ndugulile.

Kufuatia hali hiyo  Naibu Waziri Ndugulile amewaagiza wataalam hao kushirikiana na TFDA, SIDO na TBS kuhakikisha wanatoa mafunzo ya ujasiriamali kwa wajasaliamali wadogo ili waweze kuzalisha bidhaa bora na kuwawezesha kuongeza thamani ya bidhaa zao kwa kutumia vifungashio vyenye ubora.

Wakati huo Katibu Mkuu Idara Kuu Maendeleo ya Jamii Dkt. John Jingu wakati akitoa taarifa fupi ya mkutano huo kwa Naibu Waziri Ndugulile alisema moja ya maazimio yaliyotokana na mkutano mkuu huo ni kuhakikisha majukumu yao wanayatafsiri kwa vitendo ili kuiwezesha jamii ya watanzania kufikia uchumi wa kati na wa viwanda.

Aidha, pamoja na mambo mengine wataalam hao pia wameiomba Serikali kuongeza ajira ya wataalam hao ili waweze kupatikana hadi ngazi ya kata kwa lengo la kuiwezesha jamii husika kutambua fursa za kujiletea maendeleo kwa kutumia rasilimali zinazopatikana katika maeneo yao.

Aidha Dkt. Jingu aliongeza kuwa maadhimisho ya kikao hicho yametaka Uongozi wa Halmashauri za vijiji kutenga maeneo kwa ajili ya wajasiriamali wadogo wadogo ili kuwawezesha kufanya kazi katika maeneo salama tofauti na sasa ambapo baadhi ya wajasiriamali hao wanafanyia shughuli zao nyumbani mwao.

Kongamano la Wataalam wa Maendeleo ya Jamii limefanyika sanjari na Mkutano Mkuu wa mwaka wa wataalam hao unaoendelea mkoani Arusha na umewashirikisha Wataalam wa Maendeleo ya Jamii kutoka katika sekta ya umma, taasisi za Serikali, sekta binafsi nchini na mashirika yasiyo ya kiserikali.