MAANDALIZI TIMU YA NYIKA YANOGA

MAANDALIZI ya Timu ya Taifa ya Mbio za Nyika kuelekea mashindano ya Dunia yatakayofanyika mjini Arhus Denmark Machi 30 mwaka huu yanaendelea vema.

Timu hiyo ya Taifa iko kambini jijini Arusha chini ya ufadhili wa Mamlaka ya Hifadhi ya Ngorongoro (NCAA), ikijiwinda vilivyo kuelekea mashindano hayo.

Kwa mujibu wa Katibu Mkuu wa Shirikisho la Riadha Tanzania (RT), Wilhelm Gidabuday, maandalizi kuelekea mashindano hayo yamekamilika kwa asilimia takribani 95.

Gidabuday, alisema wakati timu ikiwa kambini jukumu kubwa lilikuwa ni kushughulikia taratibu za ushiriki ikiwamo masuala ya pasi za kusafiria na viza za kuruhusu kuingia nchini Denmark.

“Tunashukuru zoezi hili ambalo lilikuwa gumu tumelikamilisha na leo kundi la mwisho la wachezaji wetu limekamilisha masuala ya viza na limerejea Arusha kuendelea na mazoezi,” alisema Gidabuday na kuongeza.

Masuala ya pasi za kusafiria imekuwa changamoto sana kwa vijana wetu, maana vijana wengi upande wa Junior walikuwa hawana pasi na viambatanisho ambavyo vingewawezesha kupata pasi hizo kwa haraka, jambo ambalo liliwafanya baadhi kuchelewa masuala ya usajili, lakini limetupa fundisho.

Gidabuday, alisema kutokana na hali hiyo shirikisho limeamua kuchukua hatua za kuendelea kuwatafutia pasi za kusafiria kwa faida ya baadaye, ili pale watakapopata fursa ya kuiwakilisha nchi kimataifa pasiwepo na tatizo hilo tena.

Katibu huyo, alisema baada ya kukamilisha masuala ya viza, timu inaendelea na mazoezi ya mwisho mwisho kabla ya kuagwa rasmi Machi 27 jijini Arusha na siku hiyo hiyo usiku kukwea pipa kwenda Denmark kupeperusha bendera ya Taifa.

Alisema, mgeni rasmi katika hafla hiyo kuagwa timu watamtangaza hivi karibuni taratibu zitakapokamilika.

Aliongeza kuwa, wana imani na maandalizi yaliyofanyika yatazaa matunda katika mashindano hayo na kuipongeza Mamlaka ya Hifadhi ya Taifa ya Ngorongoro na DStv kwa sapoti kubwa waliyoitoa kufanikisha maandalizi hayo.

Gidabuday, alisema msafara wa Tanzania katika mashindano hayo utakuwa na wachezaji 16 na viongozi ukiongozwa na Makamu wa Pili wa Rais- Ufundi RT, Dk. Hamad Ndee.

Viongozi wengine ni Kocha Mkuu Meta Petro, Kocha Msaidizi Madai Jambau na Matron Marcelina Gwandu.

Wachezaji kwa upande wa wanaume ni Marko Monko, Joseph Panga ‘Mti Mkavu’, Faraja Damas, Emanuel Giniki, Gabriel Geay, Francis Damiano na Yohana Elisante.

Wanawake ni Failuna Matanga, Magdalena Shauri, Angelina Tsere, Sisilia Ginoka, Mayselina Mbua, Amina Mgoo, Anastazia Dolomongo, Aisha Magelani na Natalia Elisante.