TUMIENI MIKATABA YA KISHERIA KUWABANA WAKULIMA ILI WASITOROSHE TUMBAKU

Mkuu wa Wilaya ya Sikonge Peres Magiri akifungua jana mkutano wa siku moja wa wadau wa sekta ya tumbaku wilayani humo. (Picha na Tiganya Vincent).

Baadhi ya washiriki wa Mkutano wa wadau wa sekta ya tumbaku wilayani Sikonge wakisikiliza jana hotuba ya ufunguzi ya Mkuu wa Wilaya ya Sikonge Peres Magiri (hayupo katika picha).

NA TIGANYA VINCENT

VIONGOZI wa Vyama vya Msingi vya Ushirika (AMCOS) wilayani Sikonge wametakiwa kuingia mikataba ya kisheria na wanachama wao ili kuwabana wasitoroshe tumbaku na kusababishia deni.

Kauli hiyo imetolewa jana na Mkuu wa Wilaya ya Sikonge Peres Magiri wakati akifungua mkutano wa siku moja wa wadau wa sekta ya tumbaku ambao uliwahusisha Madiwani , Viongozi wa AMCOS na Wawakilishi kutoka Kampuni za ununuzi wa tumbaku.

Mkuu huyo wa Wilaya ya Sikonge alisema hatua hiyo itasaidia kuuwachukulia hatua za kisheria viongozi na wanachama wanaobainika kukiuka taratibu za vyama ikiwemo kutorosha tumbaku na kuuza kwa njia ya magendo.

Magiri aliongeza kuwa vitendo vya namna hiyo vimesababisha baadhi ya AMCOS kufa kwa sababu ya kuwa na madeni na kushindwa kupata makisio ya kilimo cha tumbaku.

Aidha Mkuu huyo wa Wilaya aliwataka wanunuzi wa tumbaku kuhakikisha wanafanya mapema malipo ya wakulima ili kuepuka utoroshaji wa tumbaku kwa ajili ya kutafuta fedha za haraka za kusaidia familia zao.

Magiri alizitaka Benki kuidhinisha mikopo ya vyama vya msingi kwa wakati ili kumwezesha msambazaji kusambaza pembejeo kwa wakati.

Akisoma maazimio ya mkutano huo kwa niaba ya wadau wa sekta ya tumbaku Mwenyekiti wa Halmashauri ya Wilaya ya Sikonge Peter Mihayo Nzalalila alisema wataandika barua kwenda kwa Waziri wa Kilimo kuomba kuongezewa madaraja ya tumbaku kwa sababu uwepo wa madaraja machache umesababisha mkulima kunyonywa.

Alisema wamekubaliana kuwa Vyama vya msingi viwasaidie wakulima wao kujikomboa kiuchumi kwa kuwapa makisio ambayo yapo ndani ya uwezo wao.

Nzalalila aliongeza Vitabu vya sheria vya Bodi ya tumbaku vitafsiriwe katika lugha ya Kiswahili na kugawiwa kwa viongozi wa vyama vya msingi ili viwasaidie wanachama wote kujua haki zao za msingi.

Alisema kuwa ni vema mikopo ya pembejeo itolewe mapema mwezi wa Tisa ili wakulima wajiandae mapema kuingia kwenye msimu wa kilimo.

Nzalalila alisema kuwa makisio ya wakulima wa kujitegemea pia yaingizwe kwenye takwimu za ushirika ili wakulima hao wasikose pa kuiuzia tumbaku yao.

Awali akitoa kilio cha wakulima wa tumbaku Mwenyekiti wa Kisanga AMCOS Rashid Mazinge alisema mauzo ya msimu huu yamekuwa mabaya sana kwani wakulima wengi wameuza chini ya wastani wa Dola moja jambo ambalo litasababisha wengi wao kulaza madeni ya pembejeo.

Alisema wateuzi wa Kampuni wamekuwa wakitoa bei ya chini kwa kisingizio kuwa tumbaku ya mwaka huu haina ubora.

Aidha Mazinge alisema kuchelewa kwa mbolea kuwafikia wakulima wengi kumesababishia hasara kubwa wakulima na kupata bei ya chini.