WAZAZI SHIRIKINI KATIKA MAENDELEO YA ELIMU-NZUNDA

NA TIGANYA VINCENT

 

SERIKALI imewataka wazazi kushiriki katika shughuli za uboreshaji wa elimu na mazingira ya watoto kujifunza ikiwemo ujenzi wa madarasa ili kupunguza msongamano katika baadhi ya maeneo.

Kauli hiyo imetolewa leo mjini Mwanza na Naibu Katibu Mkuu, Ofisi ya Rais Tawala za Mikoa na Serikali za Mitaa (TAMISEMI) - anayeshughulikia Elimu Tixon Nzunda wakati wa ufunguzi wa kikao kazi cha kuandaa vipindi vya redio kupitia Mpango wa Kuinua Ubora wa Elimu Tanzania (MKUE-Tanzania).

Alisema kuna baadhi ya wananchi walitafsiri vibaya tamko la Serikali la elimu bure na kuacha kushiriki katika hata ujenzi wa madarasa, nyumba za walimu, utoaji wa chakula kwa wanafunzi na kazi nyingine za kuinua kiwango cha elimu.

Nzunda alisema Serikali iliposema hakuna ada haikukataza wananchi kushiriki kwenye shughuli za maendeleo ya elimu kama vile utoaji wa chakula kwa ajili ya watoto, ujenzi wa nyumba za walimu na madarasa.

Alisema matokeo ya wananchi kutoshiriki shughuli za maendeleo ya shule yameanza kujionyesha katika maeneo ambayo wananchi hawashiriki kwa maendeleo duni ya elimu na kule wananchi wanaposhiriki kumekuwepo na mafanikio.

Nzuda alisema maendeleo ya elimu nchini yanapaswa kuwepo na ushirikiano wa utatu yaani Mwalimu, Mzazi na Serikali.