Bilioni mbili kutumika katika kununua madawati

Na Talib Ussi, Zanzibar

Katika kuhakikisha wanafunzi wanapata elimu katika mazingira bora Serikali ya Mapinduzi ya Zanzibar (SMZ) imesema itatumia zaidi ya Sh. Bilioni 2 zitatumika kwa ajili ya kununulia madawati ya Skuli za Msingi.

Akizungumza wakati wa Mkutano wa kujadili hatua iliyofikia juu ya makusanyo ya fedha za madawati hayo, Mwenyekiti wa Kamati ya Kitaifa ya uhamasishaji ya upatikanaji wa madawati katika Skuli za Serikali,  Haroun  Ali Suleiman, ambaye pia Ni Waziri wa Utumishi na Utawala bora Zanzibar  alisema kupitia fedha hizo, wanatarajia kununua jumla ya madawati Kumi na nne elfu na sitini na tano.

Alisema  tayari Wizara ya Elimu na Mafunzo ya Amali Zanzibar, imeshatangaza tenda kwa kampuni mbalimbali ambapo kampuni nne zimeshachaguliwa za  nchini China, na muda mfupi wataalamu watakwenda kukagua ili kujiridhisha viwango wanavyovihitaji kwa madawati hayo.

“Ifikapo mwishoni mwa Disemba mpaka January mwakani madawati hayo yatakuwa tayari yameshawasili nchini” alisema Haroun.

Aidha alifahamisha kuwa juhudi  hizo ni miongoni mwa Malengo ya Rais wa Zanzibar na Mwenyekiti wa Baraza la Mapinduzi Dk.Ali Mohammed Shein katika kuwasaidia wananchi wake hasa wanafunzi kusoma katika Mazingira mazuri na salama ili kupata wataalamu zaidi hapa nchini.

Aidha Mhe Haroun amemshukuru Mhe Rais wa Zanzibar, kwa kuanzisha kamati hiyo ambayo imeisaidia Wizara ya Elimu juu ya ununuzi wa Madawati kupitia michango ya wadau mbalimbali nchini ambayo imeweza kufanikiwa kwa kiasi kikubwa.

Alieleza kuwa madawati hayo ambayo yatakuwa ni awamu ya kwanza yahusisha  Skuli za Msingi ili kusaidia kupunguza tatizo la madawati katika Skuli mbalimbali Unguja na Pemba.

Pia aliwaomba wananchi wote wa  Zanzibar kuendelea kushirikiana na kushajiishana kutoa michango mbalimbali ili kuwasaidia vijana wao waweze kusoma katika mazingira mazuri, kwani juhudi hizo zimeonekana kwa kuweza kuongeza idadi ya ufaulu kwa wanafunzi katika ngazi mbalimbali nchini.

Nae Makamo mwenyekiti wa kamati ya Madawati Riziki Pembe Juma ameitaka Wizara ya nchi Ofisi ya Rais Tawala za Mikoa, Serikali za Mitaa na Idara Maalum za SMZ kuhakikisha wanafanya maandalizi juu ya madarasa yatakayowekwa madawati hayo kutokana na usalama wa maeneo ya Skuli kwani zinaonekana baadhi yake hazipo salama kuwekwa madawati hayo.

Kwa upande wao wajumbe wa kamati hiyo walitoa ushauri wao kuhakikisha ubora wa madawati yatakayonunuliwa yanakuwa na kiwango, kwani upo uwezekano wa kuchakachuliwa na kusababisha kuingia hasara baadae.

Serikali zote mbili Tanzania zipo katika mpango maalum wa kuwezesha wanafunzi kuondokana kukalia sakafu kwa kueneza madawati.