Mtonga FC wabanwa na Bodaboda FC

MWANAMKUU MBAROUK, TANGA

MABINGWA watetezi wa mashindano ya Voa Marmar Best Cup, Mtonga FC wamelazimishwa sare ya bao 1-1 na Bodaboda FC katika mchezo wa kwanza wa hatua ya robo fainali uliyochezwa  uwanja wa Matondolo Wilaya ya Korogwe mkoani Tanga.

Mchezo huo uliokuwa wa kuvutia kutokana na wachezaji wa timu hizo kuonyesha ufundi wa kutandaza soka hasa la chini chini, jambo ambalo liliwafanya mashabiki kupata burudani safi.

Bodaboda FC ilianza kupata bao mapema dakika ya tano lililofungwa na straika wake, Makange Aloice kabla ya mabingwa watetezi kusawazisha dakika ya 26 kupitia Semi Gasper.

Mkurugenzi wa mashindano hayo, Martin Mhina, alisema kadiri michuano hiyo inavyoendelea ndivyo ushindani unavyoongezeka na kuwaomba mashabiki kuzidi kujitokeza kushuhudia vipaji.