Namungo FC kuanika silaha zake Agosti 10

NA MWANDISHI WETU

UONGOZI wa Namungo FC inayoshiriki Ligi Kuu Tanzania Bara (TPL), kwa mara ya kwanza, unatarajia kutambulisha kikosi chao cha msimu ujao kwa kucheza na Polisi Tanzania Agosti 10, kwenye Uwanja wa Majaliwa, wilayani Ruangwa mkoani Lindi.

Namungo FC yenye maskani yake wilayani Ruangwa mkoani Lindi, ni miongoni mwa timu ambazo zinapewa kipa umbele cha kufanya msimu ujao kutokana na usajili waliofanya na kiwango walichokionyesha msimu uliopita Ligi Daraja la Kwanza (FDL).

Siku hiyo ambayo mashabiki wa Namungo wataingia bure uwanjani hapo, itaambatana na mchezo ya kujipima nguvu, dhidi ya Polisi Tanzania ambao wamepanda daraja msimu huu kutoka Kundi B la FDL.

Akizungumza na TanzaniaDaima, Mwenyekiti wa Namungo FC, Hassani Zidadu, alisema alisema wameamua kutambulisha kikosi chao siku hiyo ili wakazi wa Ruangwa wawatambue nyota wao kabla ya kuanza kwa ligi msimu ujao.

“Tunatarajia kutambulisha kikosi chetu chote na Benchi la Ufundi tulikuwa bado hatujamaliza taratibu za usajili, hivyo tutafanya utambulisho ili kuwajuza mashabiki kukifahamu kikosi chetu.

“Kikubwa ni wakazi wa Ruangwa kujitokeza kwa wingi siku hiyo kuona timu yao na kiingilio ni miguu yako tu! Maana tunatakiwa tujitokeze kwa wingi,” alisema.