BOBALI; CCM INATUOGOPA WAPINZANI

Mwenyekiti wa Jumuiya ya Vijana Chama cha Wananchi (JUVICUF), Hamidu Bobali, akizungumza na waandishi kuhusu hujuma ambazo zinazofanywa na wasimamizi wasaidizi wa uchaguzi katika maeneo mbalimbali nchini. Kushoto ni Mkurugenzi wa Mipango na Uchaguzi Issa Shing'alang'ata na kulia ni Mkurugenzi wa Haki za Binadamu, Khomein Rwihulla. (Picha na Suleiman Msuya).

NA SULEIMAN MSUYA

MWENYEKITI wa Jumuiya ya Vijana Chama cha Wananchi (JUVICUF), Hamidu Bobali, amesema hujuma zinazofanywa na wasimamizi wa uchaguzi wa Serikali za Mitaa, Vitongoji na Vijiji kwa kuwanyima fomu wagombea wa nafasi ya uenyekiti na ujumbe wa vyama vya upinzani ni ushahidi tosha kuwa Chama cha Mapinduzi (CCM) kinawaogopa wapinzani.

Bobali aliyasema hayo leo wakati akizungumza na waandishi wa habari jijini Dar es Salaam, ambapo alibainisha kuwa mchakato mzima wa uchukuaji na urejeshaji wa fomu za kugombea umegubikwa na hila na hujuma nyingi.

Bobali alisema JUVICUF imefanya tathmini ambayo imeonesha ushahidi tosha kuwa CCM imeyumba hivyo inaamini katika figisu na ubabe ambao hauwezi kufanikiwa katika ulimwengu wa sasa wa uwazi na ukweli.

“Kinachoendelea kwenye mchakato wa utoaji fomu ni ushahidi kuwa CCM imeyumba, mbaya zaidi inawezekana Mwenyekiti wa CCM Rais John Magufuli hajui au anadanganywa hivyo wanatumia mbinu ya kuwanyima wapinzani fomu kumthibitishia chama chake kipo.

Hila tunazofanyiwa CUF zimepitiliza tunatoa rai kwa Rais Magufuli na Waziri wa Nchi Ofisi ya Rais TAMISEMI, Selemani Jafo wajitokeze na kukemea ukiukwaji wa kanuni unaondelea hatuwezi kuvumilia uonevu huo tena,” alisema.

Amedai hadi jana wilayani Liwale mkoani Lindi, wagombea wa vyama vya upinzani hawajapewa fomu huku CCM wakipewa siku moja kabla ya tarehe ya kuanza, jambo ambalo ni ukiukwaji wa kanuni za uchaguzi huo muhimu kwa maendeleo ya nchi.

Bobali amedai hali hiyo imetokea pia wilayani Maswa kata 11 wagombea wao hawajapewa fomu huku jimboni Mchinga wilayani Lindi msimamizi ametoa maelekezo kwa wasimamizi wasaidizi wawape daftari tofauti na linalotakiwa kusainiwa na vyama vingine.

“Hali ya Liwale ni mbaya sana hakuna mgombea wa upinzani amepewa fomu wasimamizi wamefunga ofisi wiki nzima na hakuna hatua ambazo zimechukuliwa jambo ambalo linaenda kinyume na kauli za Rais Magufuli anayejiita Rais wa wanyonge sijui wanyonge anawataja ni wapi kama sio hao wanaochagua viongozi wa mitaa,” alisema.

Mwenyekiti huyo amedai kuwa Rais Magufuli angepaswa kutumia uchaguzi huu kupima chama chake na serikali kwamba wanakubalika kwa wananchi.

Amedai kauli ya Waziri Jafo kuwa vyama vya siasa viache kuibua utata ambao unaweza kuharibu uchaguzi kwa hoja ya kuwa dosari zilizojitokeza ni ndogo Bobali alisema wao hawatoi kauli tata bali hali halisi ambayo ipo hasa Liwale sio dosari ndogo bali ni kubwa na wanamtaka waziri kumuondoa msimamizi wa uchaguzi.