Kilimanjaro Marathon yazinduliwa rasmi kwa kishindo

Usajili mtandaoni, Tigopesa tayari umeanza

 Mbio maarufu za Kilimanjaro Premium Lager Marathon za 18 zimezinduliwa rasmi leo jijini Dar es Salaam na Waziri wa Habari, Utamaduni, Sanaa na Michezo, Mh. Dk Harrison Mwakyembe huku akitoa wito kwa watanzania wajitokeze kwa wingi kushiriki mwakani.

Akizungumza katika hoteli ya Best Western Coral Beach, Waziri Mwakyembe amewapongeza wadhamini wa Kilimanjaro Marathon wakiongozwa na Kilimanjaro Premium Lager-42 km, Tigo 21km na Grand Malt 5km kwa kudhamiria kukuza sekta ya michezo hususani riadha na kufanya mbio hizi kuwa kubwa mwaka hadi mwaka.

“Inatia moyo sana kuona kuwa Kilimanjaro Marathon sasa hivi ina washiriki Zaidi ya 11,000 kutoka nchi Zaidi ya 56 kote duniani. Hili ni jambo zuri sana kwa taifa kwani tunapata fedha za kigeni kutokana na matumizi yanayofanywa na wageni hawa nchini ikiwemo utalii ambao sasa hivi tuna kitu kinachojulikana kama sports tourism,” alisema huku akitoa changamoto kwa watanzania pia wachangamkie fursa ya kufanya utalii wa ndani baada ya mashindano haya.

Naye Rais wa Chama Cha Riadha Tanzania, Anthony Mtaka, alitoa wito kwa washiriki wazalendo kuchangamkia zawadi zinazotolewa na Kilimanjaro Marathon badala ya kukimbilia kushiriki mbio za nje ambazo zawadi zake ni ndogo.

 “Ni vizuri kwenda kupata exposure lakini tusiache zawadi nzuri nyumbani na kufuata hela ndogo huko nje wakati tunaweza kuzipata hapa,” alisema.

Meneja wa Bia ya Kilimanjaro Premium Lager, Pamela Kikuli, alisema tangu mashindano yaanze Kilimanjaro Premium Lager imewekeza hela nyingi sio tu kusukuma mauzo ambayo wamefanikiwa kwa kiasi kikubwa, lakini pia kutengeneza ajira na kuchangia uchumi kwa ujumla kupitia gharama za kuyatangaza,promosheni na masuala mengine ya kimasoko.

“Msimu huu wa Kilimanjaro Marathon pia utakuwa na faida kubwa kwa wafanyabiashara, sio sisi wa bia ya Kilimanjaro Premium Lager tu, bali hata wa chakula, sehemu za kulala wageni, mahoteli na biashara nyingine,” alisema.

Meneja huyo aliongeza kuwa watatumia fursa hii ya Kilimanjaro Marathon kutangaza chupa mpya ya Kilimajaro Premium Lager ambayo ilizinduliwa Juni mwaka huu na ina pamoja na mambo mengine  maudhui mbalimbali ya kiafrika (African pattern) maana bia ya Kilimanjaro inajivunia kupeperusha bendera ya Tanzania.

Naye Meneja Mawasiliano wa Tigo, Woinde Shisael alisema kampuni yake inajivunia kudhamini mbio za km 21 kwa mwaka wa tano mfulululizo sasa ambayo ni sehemu ya mashindno haya ya Kilimanjaro Marathon. “Tunajivunia kuwa sehemu ya tukio hili kubwa ambalo linawaleta pamoja wanariadha wakubwa  na watu mbalimbali kutoka kila sehemu kusherehekea michezo, burudani, utamaduni, utalii na afya njema.” alisema. 

"Natoa wito kwa washiriki kujisajili kwa kupiga namba *149*20# ili waweze kushiriki katika mbio za kilometa 21,” alisema na kuongeza kuwa Tigo inashirikiana na makampuni mengine kudhamini Kilimanjaro Marathon ambayo pamoja na mambo mengine inakuza utalii pamoja na kuzileta pamoja familia mbalimbali na marafiki kutoka pande zote za dunia katika kumbukumbu zisizosahaulika. 

Naye Mwakilishi wa Grand Malt, David Tarimo alisema mwaka huu wamejiandaa vizuri na kuwataka washiriki wa kilometa tano wajiandikishe kwa wingi kwani kutakuwa na Grand Malt za kutosha na zawadi mbalimbali pamoja na kuwaonesha washiriki kopo lao jipya la 330ml ambalo lilizinduliwa mwaka huu na linapatikana nchi nzima kwa bei ile ile ya Tsh 2000. “Grand Malt ambayo ipo kwenye kopo lenye muonekano mzuri zaidi, ni kinywaji sahihi kwa wanariadha na ni kinywaji ambacho hakina madhara hata kwa watoto,” alisema.

Wadhamini wengine katika Kilimanjaro Marathon ni pamoja na Kilimanjaro Water, Barclays Bank, Simba Cement, TPC Sugar, Precision Air, Kibo Palace Hotel, Garda World Security, Keys Hotel na CMC Automobiles.

Kwa mujibu ya waandaaji wa Kilimanjaro Marathon-Wild Frontiers na Executive Solutions, usajili umeshaanza kwa mtandao kupitia www.kilimanjaromarathon.com. Hadi sasa waliojisajili ni asilimia 20 zaidi ya idadi ambayo ilikuwa imejisajili muda kama huu mwaka jana. “Hii ni dalili nzuri kuwa usajili utakuwa mzuri zaidi msimu huu,” walisema na kuongeza kuwa kutakuwa na usajili Dar es Salaam, Arusha na Moshi Februari mwakani.

Waandaaji hao pia walitoa wito kwa washiriki wachangamkie punguzo la bei ambalo lilianza Oktoba Mosi 2019 hadi Januari 14 , 2020. Kwa raia wa Tanzania na wale kutoka nchi za Afrika Mashariki watalipa Tsh 15,000 kwa mbio za Km 42 na 21 na Tsh 5000 kwa km 5 lakini kuanzia Januari 15, 2020 hadi Februari 16, 2020 washiriki watakaojisajili watalipa Tsh 20,000 kwa km 42 na 21 na Tsh 5000 kwa km 5. 

Kwa wageni wakazi au wenye vibali vya kuishi na kufanya kazi na wale wa nchi za SADC watalipa USD 35 kwa km 42 na 21 na USD 5 kwa km 5 kuanzia Octoba 1, 2019 hadi Januari 14, 2020 lakini kuanzia Januari 15, 2020 hadi Februari 16, 2020 wanaojisajili watalipa USD 45 kwa km 42 na 21 na USD 5 kwa km 5.  

Washiriki wa kimataifa watalipa USD 70 kwa km 42 na 21 na USD 5 kwa km 5 kuanzia Oktoba 1, 2019 hadi Januari 14, 2020 na kuanzia Januari 15 hadi Februari 16, 2020 watalipa USD 85 kwa km 42 na Km 21 na USD 5 kwa km 5. 

Kwa mujibu wa waandaaji hao, usajili utafungwa rasmi saa sita usiku Februari 16, 2020 au pale ambapo idadi inayotakiwa itatimia. 

Uzinduzi huo pia ulihudhuriwa na wawakilishi kutoka Chama Cha Riadha Tanzania, Baraza la Michezo Tanzania, Bodi ya Utalii Tannzania na wadau wengine wa riadha.

Mashindano ya Kilimanjaro Marathon yanatarajiwa kufanyika Machi 1, 2020 Moshi mjini.