CHADEMA UBUNGO YALIA NA RAFU

Mwenyekiti wa Chadema Ubungo, Idan Msuya (kulia), akizungumza na waandishi wa habari jijini Dar es Salaam kuhusu zoezi la uchukuaji na urudishaji fomu za kugombea uchaguzi wa serikali za mitaa. (Picha na Tatu Mohamed). 

NA TATU MOHAMED

CHAMA cha Demokrasia na Maendeleo  (Chadema) jimbo la Ubungo kimelalamikia kufanyiwa figisufigisu katika zoezi la uchukuaji na urudishaji fomu za kugombea uchaguzi wa serikali za mitaa ambalo limemalizika leo. 

Akizungumza na waandishi wa habari jijini Dar es Salaam Mwenyekiti wa Chadema Ubungo, Idan Msuya, amesema yapo maeneo ambayo wamebaini kuwekwa majina hewa huku wasimamizi wakigoma kuwasikiliza.

Amesema Mtaa wa Msewe wameongeza majina ya watu hewa 400 na mitaa mingine na kwamba ushahidi wanao.

"Watu hao wameongezwa kwa lengo la kujihami ili kumfurahisha Rais John magufuli kuwa wameandikisha watu wengi kumbe kiuhalisia sio kweli.

"Yaani tunashangazwa kufanyiwa figisu katika mchakato wa uchaguzi wa serikali za mtaa wakati tuna  miaka minne hatujawahi kufanya kampeni za chama wala mikutano," amesema.

Aidha amesema wasimamizi walikuwa wakali  katika utoaji wa fomu na ukionekana unadai kwa nguvu unaitiwa polisi.

“Katika hizi fomu kuna kipengele namba C mpokeaji anaposwa kupokea fomu kutia saini, kuweka mhuru na kuonyesha kuwa fomu ameipokea saa ngapi mbele ya yule aliyerejesha fomu kwenye mitaa mingi ya Ubungo hilo halijafanyika hata tulivyowaomba nakala ya fomu waligoma kuzitoa.

"Nilivyopiga simu kwa mmoja wa wasimamizi alinijibu kuwa kwa sasa wametoa maelekezo zisitolewe hizo fomu  wala kusaini hadi Novemba 5, 2019 jambo ambalo  lipo nje ya utaratibu. Utaratibu unamtaka mgombea asitoke bila kupatiwa nakala hicho kitendo kinaacha mianya ya kufanyia uovu katika zoezi a urejeshaji wa fomu,” amesema.

Msuya amesema kitendo cha mgombea wake kuondoka bila fomu ya kuonyesha kuwa amerejesha fomu ina maana wanaweza kuambiwa mgombea hakurudisha fomu kwa muda unaotakiwa.

Ameongeza kuwa kuna Kata zimetumika fomu za kughushi zikionyesha zimegongwa mhuri wa kata wakati sio kweli