WANAWAKE 100 KUPATIWA MAFUNZO YA UDEREVA

Mkuu wa Chuo cha NIT, Prof. Zacharia Mganilwa, akizungumza wakati wa kufungua mafunzo ya madereva wa mabasi wanawake katika Chuo cha Taifa cha Usafirishaji (NIT).

 NA TATU MOHAMED

WAZIRI wa Ujenzi, Uchukuzi na Mawasiliano, Mhandisi Isack Kamwelwe amesema kuwepo kwa madereva wengi wanawake kutaenda kuwa muarobaini wa ajali nchini kutokana na umakini wao wawapo barabarani.

Waziri Kamwelwe ameyasema hayo wakati wa kufungua mafunzo ya madereva wa mabasi wanawake katika Chuo cha Taifa cha Usafirishaji (NIT) ambapo amesema endapo  madereva wengi wa mabasi wangekuwa wanawake kusingekuwepo kwa ajali za barabarani za mara kwa mara .

Amesema, mafunzo hayo ambayo yanatarajiwa kuwa na wanawake 100 yamekuja wakati muafaka kwani serikali inatelekeza Dira ya Taifa ya Maendeleo ya kufikia uchumi wa viwanda ifikapo 2025 kwa kujenga miundombinu mbalimbali.

‘’Tunaamini wanawake wataboresha usalama wa usafiri kwa maendeleo endelevu. Mtumie elimu mtakayopata kulinda rasilimali za watanzania zilizopatikana kupitia kodi zao kwa sababu tunaamini mtapata ajira katika taasisi mbalimbali,’’ amesema Kamwelwe.

Ameongeza kuwa watahakikisha wanasogeza mafunzo hayo katika Mikoa ya Arusha, Mwanza na Mbeya ili wanawake wengi waweze kufundishwa udereva wa mabasi na magari makubwa.

Naye, Mkuu wa Chuo cha NIT, Profesa Zacharia Mganilwa amesema watatoa mafunzo kwa madereva hao kati ya 300 walioomba mafunzo hayo ambapo baada ya kukamilika kwa wiki saba watafanikiwa kupata leseni ya daraja C itakayowapa fursa ya kuendesha magari ya abiria.

Amesema wameweka mkakati wa kuanzisha kitengo cha mafunzo ya usalama barabarani ikiwemo kutoa wataalamu wa mizani ili kusaidia Wakala wa Barabara Tanzania (TANROADS) katika utekelezaji wa majukumu yao.

Kwa upande wake, Mkurugenzi Mtendaji wa Mamlaka ya Udhibiti Usafiri Ardhini (LATRA), Gilliard Ngewe amesema ajali nyingi za barabarani zinazotokea kwa asilimia 76 hadi 80 husababishwa na makosa ya kibinadamu ikiwemo madereva.

Kwa upande wake, Kamanda wa Polisi, Kikosi cha Usalama Barabarani, Fortunatus Musilimu amesema wanaamini ajira nyingi zitapatikana kwa madereva hao wanawake baada ya mafunzo hayo.

Amesema madereva hao watahangia ukuaji wa uchumi wa kati kwa kusafirisha malighafi mbalimbali zitakazozalishwa kupitia viwanda vilivyopo na kwamba watasaidia kuboresha usalama barabarani.

‘’Takwimu za ajali kati ya wanawake na wanaume kwa kipindi cha Januari hadi Septemba 2019  zilikuwa 110 na kati ya hizo madereva wanaume 109 walipoteza maisha huku kukiwepo kifo kimoja kwa dereva wa kike. Upande wa majeruhi ni madereva 209 kati yao 182 wanaume na wanawake ni 27,’’ alisisitiza.

Kwa mujibu wa Musilimu, wanawake wapo makini barabarani na ni kundi ambalo liko salama katika masuala ya ajali barabarani.