Kilosa kutumia vijiji vya TTCS kusambaza USM

Ofisa Mradi anayeshughulikia Maendeleo ya Jamii na Utawala wa Shirika la Kuhifadhi Misitu ya Asili Tanzania (TFCG), Michael Nilonga akizungumza na waandishi kuhusu Mradi wa Kuleta Mageuzi katika Sekta ya Mkaa Tanzania (TTCS) ulivyosaidia  wana Vijiji zaidi ya 800 kupata Hati za Hakimili za Kimila wilayani Kilosa mkoani Morogoro.


Na Suleman Msuya

WILAYA ya Kilosa imepanga kutumia uzoefu wa uhifadhi wa misitu katika vijiji 20 vilivyopo kwenye Mradi wa Kuleta Mageuzi katika Sekta ya Mkaa Tanzania (TTCS), kuendeleza Usimamizi Shirikishi wa Misitu (USM) wilayani humo.

Vijiji 20 vinavyotekeleza mradi wa TTCS unaohimiza USM, ilioanza kutekelezwa mwaka 2012 chini ya Shirika la Kuhifadhi Misitu Asili Tanzania (TFCG), Mtandao wa Jamii wa Usimamizi wa Misitu Tanzania (Mjumita) na Shirika la Kuendeleza Nishati Asili  Tanzania (TaTEDO) kupitia ufadhili wa Shirika la Maendeleo la Uswis (SDC) umechochea uhifadhi katika vijiji hivyo.

Akizungumza na waandishi wa habari ofisini kwake jana, Mkuu wa Wilaya hiyo Adam Mgoi, alisema mradi wa TTCS umeweza kuleta mabadiliko makubwa katika sekta ya misitu na mazingira jambo ambalo limechangiwa na uwepo wa mpango wa USM.

Mgoi alisema Kilosa ilikuwa na changamoto kubwa ya uharibifu wa mazingira kutokana na uwepo wa rasilimali nyingi za misitu isiyosimamiwa vizuri lakini baada ya mradi kuja umefanikisha kuwepo mpango mzuri wa matumizi ya ardhi na uvunaji msitu.

“TTCS imefanikisha USM kuwepo wilayani kwetu katika vijiji 20 hivyo tunaahidi kusamba elimu hiyo katika vijiji 119 vilivyobakia ili siku moja Kilosa ile ya miaka ya nyuma iweze kurejea na mazingira kuwa rafiki.

Kwa sasa mpango wa ukataji miti kiholela haupo, lakini pia ipo fursa ya miti mingine kuweza kuota katika maeneo ambayo awali yalikuwa yanakabiliwa na uharibifu,” alisema.

Mgoi alisema pamoja na uhifadhi kuongeza vijiji, halmashauri na wanavijiji wamekuwa wakinufaika na rasilimali mizitu jambo ambalo linawasukuma kusamba mradi huo ili kunufaisha jamii ya Kilosa.

Mkuu wa wilaya alisema pia wamenufaika na mpango wa matumizi bora ya ardhi hivyo kumaliza migogoro baina ya wakulima, wafugaji na wananchi wengine.

“Halmashauri tumejipanga kuhakikisha kwamba hili linakuwa la vijiji vyote 139 vilivyopo ambapo wataalam wetu watapatiwa fedha na halmashauri kuanza utekelezaji, lakini bado tunaomba mradi utuangalie katika awamu ya tatu tupate vijiji vingine,” alisema.

Mgoi alitoa wito kwa wananchi wa Kilosa ambao wamefanikiwa kupata Hati za Hakimiliki za Kimila kuzitumia kwa ajili ya kujiongezea kipato kwa kuchukua mikopo kwenye taasisi za fedha na pia zitumike kuondoa migogoro ambayo imekuwa kwa muda mrefu.

Akizungumzia mradi huo Mtendaji wa Kijiji cha Madizini kata ya Kisanga, Cosmas Tayari alisema kijiji awali kilikuwa na migogoro mingi ya ardhi lakini ujio wa TTCS umeweza kumaliza migogoro.

“Mradi huu ni fursa ambapo wananchi wamepata elimu ya kutosha kuhusu uhifadhi wa misitu endelevu na upimaji wa ardhi ambapo zaidi ya wananchi 200 wamepatiwa hati za hakimiliki za kimila ni wazi thamani ya ardhi itaongezeka,” alisema.

Ofisa Mradi anayeshughulikia Maendeleo ya Jamii na Utawala kutoka TFCG, Michael Nilonga alisema katika vijiji 20 vya Kilosa wamefanikiwa kutoa hati za hakimiliki za kimila kwa wanavijiji zaidi ya 800 katika vijiji vitano vya Kigunga (62), Nyali (200), Madizini (200), Dodoma Isanga (200), Ulaya Mbuyuni (125)

Alisema wanatoa vipambele kwa familia ambazo zina kipato kidogo, zenye mzazi mmoja hasa wakina mama na wahitaji kwa kuzingatia vigezo vya umiliki na kuepuka maeneo yenye migogoro.

Nilonga alisema ili kikijiji kipate hati za hakimiliki za kimila ni lazima kiwe vigezo vitatu ambavyo ni cheti cha kijiji, mpango wa matumizi bora ya ardhi na masijala ya ardhi hivyo kuiomba Halmashauri ya Kilosa kuongeza kasi ya utoaji wav yeti vya vijiji.

Wanavijiji wa Kijiji cha Madizini William Mwinge, Anthony Pacific,  Joanitha Kiwanga na Joram Mahiwa, Agnes Mathius na Mwanaharusi Athuman wa Kijiji cha Nyali wamesema mradi wa TTTCS umeweza kuwakomba kimaisha, kiuchumi na kijamii.