TAN TRADE YAJIVUNIA UKUAJI WA VIWANDA NCHINI

Na Faraja Ezra

IMEELEZWA kuwa ukuaji wa  viwanda nchini hivi sasa umeongezeka zaidi  kutoka viwanda 513 mwaka 2018 hadi  kufikia viwanda 542 mwaka 2019.

Aidha  ongezeko hilo linaleta hamasa kwa wadau mbali mbali wa biashara hasa katika sekta binafsi na Umma kuweza kuwekeza zaidi katika bidhaa zinazozalishwa ndani ya nchi.

Akizungumza na waandishi wa habari jani jijini Dar es Salaam katika kilele cha maonesho ya nne ya viwanda nchini  Kaimu Mkurugenzi wa Maendeleo Idara ya Viwanda nchini Leo Lyayuka, alisema kiwango hicho kinakuza miundombinu ya biashara.

Alisema ongezeko hilo ni juhudi zinazofanywa na wazalishaji na wanunuzi wa ndani kuweka Ubunifu katika kuboresha bidhaa ili kuleta ushindani katika soko la ajira ndani na nje ya nchi.

"Sisi kama serikali tunayo jukumu la kuhakikisha sekta ya uchumi nchini inakua kwa kiwango kikubwa ili kuendana na azma ya serikali ya uchumi wa viwanda ifikapo mwaka 2025," alisema Lyayuka.

Hata hivyo Lyayuka amewataka wadau mbalimbali  wa biashara nchini kuweka kipaumbele zaidi  kwenye bidhaa za ndani lakini pia kuzalisha kwa wingi na  zenye ubora wa hali ya juu ili kuleta ushindani katika soko la dunia. 

Lyayuka alieleza kuwa ili kuendana na soko la  dunia ni lazima  wazalishaji kuwa na ubunifu katika kuzalisha bidhaa zenye ubora ili ziweze kupata soko kwa haraka zaidi.

Naye Mkurugenzi Mkuu wa Mamlaka ya Maendeleo ya biashara Tanzania (Tantrade) Edwin Rutageruka alisema  maonyesho hayo yalianza rasmi disemba 5 hadi 9 mwaka 2019 yakilenga kuonesha bidhaa  mbali mbali zinazozalishwa nchini.

 Alisema  wadau wa Tantrade wameweza kupiga hatua kubwa ya kibiashara  kwa kuzalisha bidhaa Bora na zenye kukubalika katika masoko mbali mbali duniani.

Pia kutokana na  maonyesho hayo Rutageruka alisema wanunuzi wamevutiwa sana na kazi zao  kwa kuwa na ubora wa hali ya juu.

Ametoa wito kwa wazalishaji kuendelea kuweka kipaumbele bidhaa za ndani pasi na bidhaa zinazozalishwa nje ya nchi.

" Tupende kutumia bidhaa zetu ili ziweze kuleta tija kwa wazawa wenyewe kabla ya kuwanufaisha wageni, " alisema Rutageruka.