Wazee Kagera watekeleza agizo la Dk. Bashiru

Na Lydia Lugakila, Kagera

SHIRIKA la Kwa Wazee Nshamba lililoko wilayani Muleba mkoani Kagera wametekeleza agizo la Katibu Mkuu wa Chama cha Mapinduzi (CCM) Taifa Dk. Bashiru Ally la kuhakikisha wanaunda mabaraza ya wazee ya chama hicho yatakayosaidia kuwaunganisha ili waweze kutambuliwa na kupata huduma za muhimu na stahiki zao ikiwemo pensheni.

DK. Bashiru alitoa agizo hilo Januari mosi mwaka huu baada ya kukutana na kufanya mazumgumzo na shirika hilo alipokuwa likizo nyumbani kwake Kanazi Bukoba vijijini ambapo katika mazungumzo hayo, pamoja na mambo mengine, shirika hilo linayojumuisha wazee 29, 945 kutoka kila Kata, Wilayani Muleba pia waliipongeza CCM kwa kuanzisha utaratibu wa Mabaraza ya Wazee katika kila ngazi na wao wakaahidi kuwa mstari wa mbele kuhamasisha wazee wote wanajiunga kwenye mabaraza hayo ili changamoto zao zipate urahisi wa kusikilizwa na kutatuliwa kwa pamoja.

Akizungumza, Mkurugenzi wa shirika hilo Lydia Lugazia kwa niaba ya wazee wa taasisi hiyo alisema baada ya kuasisiwa taratibu hizo, wamefarijika kwa kuwa sasa watapata sehemu sahihi ya kupeleka changamoto zao kwa pamoja na kwa kuwa wao walianzisha mabaraza huru yanayowaweka pamoja chini ya Taaisi ya KWA WAZEE, hivyo wakaahidi kutoa ushirikiano na kuhamasisha wazee wote wawe kwenye Mabaraza hayo ili changamoto zao zitatuliwe kwa pamoja.

"Mwanzoni mwa mwaka huu tuliombwa na Dk. Bashiru kwamba shirika letu tushirikiane na Halmashauri ya Wilaya ya Muleba kuunda mabaraza ya wazee ili kupata huduma mbalimbali tukiwa kwenye chombo kinachotambulika kitaifa hivyo sisi bila kusubiri tumetekeleza agizo hilo"alieleza Lydia.

Katika mazungumzo hayo yaliyofanyika Januari mosi mwaka huu, Dk. Bashiru aliwahakikishia nia ya dhati ya Mwenyekiti wa CCM na Rais wa Jamhuri ya Muungano wa Tanzania Dk.John Pombe Magufuli ya kuunda mabaraza hayo ni kuwa karibu zaidi na wazee na siku zote amekuwa mstari wa mbele kuhakikisha changomoto zao mbalimbali zikiwemo za Afya zinatatuliwa hivyo akawataka kuhakikisha wanasimamia na kukamilisha mabaraza hayo mapema ili wazee waweze kutambuliwa na kupata haki na stahiki zao kwani wao ni hazina kubwa ya Taifa hili.

Elena Bejumla (65) alisema wao wanaofadhiriwa na shirika hilo wameweza kupatiwa pensheni ya kila mwezi kiasi cha shilingi 14,500 kwa kila mmoja pia wanapewa huduma ya utetezi wa kisheria pale wanapofanyiwa vitendo vya unyanyasaji, udhalilishaji na kuwasaidia kupata matibabu, kuwasaidia kulea yatima walioachiwa na watoto wao.

"Ninaimani tukiunda mabaraza ya CCM, huduma hii itawafikia wazee wengi maana kuachia shirika peke yake halitoweza kutumudu sote kwa sababu kila siku wazee wanaongezaka na pia wapo ambao bado shirika halijawafikia watapata msaada sasa chini ya CCM, "alileza Elena.

Willard Byamungu (70) alisema wanaishukuru CCM kwa juhudi inazofanya za kuhakikisha wazee wanatambuliwa ili kuwezesha kupata huduma zinazostahili.

"Agizo la Dk. Bashiru limetekelezeka maana ndani ya wiki moja tangu ameondoka tumepigwa picha na shirika la kwa wazee, tumepewa vitambulisho ambapo tumeambiwa vitatusaidia kupata huduma bora za matibabu, utaratibu wa kulipwa pensheni, kuthaminiwa hata pale tunapoenda kupiga kura tulikuwa tunasubiri huko nyuma muda unaisha tunaondoka lakini sasa nikivaa kitambulisho changu shingoni watanipa kipaumbele,"alisema Byamungu.

Kwa upande wa Katibu wa Jumuiya ya Wazazi wa CCM, Wilaya ya Muleba Kengela Magesa alisema baada ya kukamilisha zoezi la kupigwa picha na kuunda mabaraza 43 yenye wanachama 29,945 katika mkutano wa adhara uliofanyika Kata ya Biilabo ambapo, aliwaelezea wazee kuwa agizo la Katibu mkuu linaendea kutekelezwa nchi nzima kwani Taifa linajipanga namna ya kuwaenzi wazee kwani wameshiriki kufanya mambo mengi katika kuikomboa nchi yetu ikiwemo vita vya Kagera.

"Nashukuru shirika hili uongozi wao walichukua jukumu la kumuona na kumuelezea katibu mkuu dhamira yao ndipo akaeleza kuwa mambo haya yashuke kuanzia ngazi ya chini ndipo hawa wakapewa jukumu hili la kuunda mabaraza ya CCM ili muweze kupaza sauti kwa pamoja hivyo wametekeleza"alisema Magesa.