CORONA TISHIO KILA KONA

Na Christina Mwakangale

WAKATI ya virusi vya Corona (COVID-19) vikizidi kushika kasi katika nchi tofauti tofauti, Tanzania imesitisha safari za nje ya nchi zisizo za lazima kwa watumishi wa umma.

Rais John Magufuli ameagiza ianze kampeni ya kuuelimisha umma juu ya virusi vya Corona katika mikusanyiko ya watu.

Rais Magufuli alitoa agizo hilo jana jijini Dar es Salaam, wakati akizindua Karakana Kuu ya Jeshi la Wananchi Tanzania (JWTZ), Lugalo.

Alisema Tanzania bado haina taarifa ya mgonjwa mwenye maambukizi hayo na ameagiza elimu iendelee kutolewa katika maeneo yote ikiwamo vyuoni na shuleni.

Virusi vya Corona ambavyo vimeenea kwa nchi zaidi ya nchi 14 za Asia, Ulaya na Afrika, vilianzia mji wa Wuhan jimbo la Hubei, nchini China, Desemba mwaka jana.

Takwimu za hadi Machi 13 mwaka huu, zinaeleza kuwa kuna taarifa za watu 136,597 na jumla ya watu 5,065 wamekwishafariki dunia kutokana na virusi hivyo, huku idadi kubwa ya vifo ikiwa China ambako tayari kuna vifo 3,179 ikifuatiwa na Italia 1,016.

Licha ya virusi vya Corona kutishia mataifa mbalimbali ambayo baadhi yameamua kusitisha safari za ndege, kuzuia mikusanyiko ya watu na kufunga mipaka yao, Rais Magufuli amewataka Watanzania wachukue tahadhari.

“Virusi vya Corona vipo duniani na vimeikumba nchi nyingi duniani na virusi vinasambaa kote lakini Tanzania hadi sasa hatujapata mgonjwa, hatuwezi kujiweka pembeni ni vizuri kuendelea kuchukua hatua na tahadhari,” alisema Rais Magufuli na kuongeza…

Lazima tujikinge, kama safari si ya lazima usisafiri, hatutatoa vibali kusafiri bila sababu hata Watanzania kusafiri kuwe na sababu.”

Pia rais alisema kuwa tahadhari itolewe kwa watu wote na si kuachiwa viongozi pekee na kwamba amemuagiza Katibu Mkuu Kiongozi, Balozi John Kijazi kutoa vibali vya safari kwa watumishi, iwapo kuna ulazima.

“Kampeni ifanyike katika kuelezea ugonjwa huu katika daladala, vyombo vya habari vitoe habari, mkilisimamia hili mtashinda, wanahabari hili ni jukumu lenu. Pia tuepushe mikusanyiko wakuu wa mikoa, wilaya, serikali, wote,” alisisitiza Rais Magufuli.

Alisema kuwa kutokana na virusi hivyo ndege ya Shirika la Ndege la Tanzania (ATCL), ambayo imefanya safari yake jana kuelekea nchini India, haitafanya tena safari kuelekea nchini humo.

“ATCL iliyokwenda India ikirudi leo, haitaenda tena, tumuombe Mungu kila mmoja katika imani yake, sasa nchi inakwenda vizuri kiuchumi ugonjwa huu ukiingia unaweza kurudisha nyuma tulipo,” alisema Rais Magufuli.

Wakati habari za Virusi vya Corona zikiendelea kutawala vichwa vya habari vya mitandao ya kijamii na vyombo vya Habari, Wizara ya Afya, Maendeleo ya Jamii, Jinsia, Wazee na Watoto imekana kuwa haijatenga Hospitali ya Mloganzila kuwa karantini ya wagonjwa watakaobainika kuwa na virusi vya ugonjwa huo.

Hata hivyo jana taarifa zilizotolewa na moja ya hospitali kubwa (jina tunalihifadhi) jijini Dar es Salaam, ilitangaza kubaini mgonjwa mmoja wa Corona ambaye ni raia wa India.

Taarifa ya hospitali hiyo ilibainisha kuwa mgonjwa alifika hospitalini hapo Machi 12 mchana, akiwa na dalili za ugonjwa huo ambapo walimuweka sehemu maalum kumchunguza zaidi.

Ilibainisha kuwa baada ya kufanya hivyo waliitarafu serikali juu ya uwepo wa mgonjwa huyo.

Hata hivyo taarifa hizo zilikanushwa na Mkuu wa Kitengo cha Mawasiliano ya Serikali, Wizara ya Afya, Maendeleo ya Jamii, Jinsia, Wazee na Watoto, Gerald Chami, alipozungumza na TanzaniaDaima juu ya uvumi huo.

“Taarifa zilizosambaa mtandaoni si za kweli hatuna mgonjwa wa Corona hadi sasa hapa Tanzania wala hospitali ya Mloganzila haijatengwa kwa ajili ya wagonjwa wa Corona” alisema.

Mkenya akutwa na Corona

Wakati Tanzania ikisema haina mgonjwa wa Corona, Kenya imethibitisha kuwepo kwa mgonjwa wa kwanza mwenye virusi hivyo.

Waziri wa Afya wa Kenya, Mutahi Kagwe alisema mtu mwenye maambikizi ya virusi vya Corona alibainika juzi usiku.

Alibainisha kuwa Mkenya huyo aliwasili nchini humo kutoka Marekani kupitia jijini London, Uingereza tangu Machi 5, mwaka huu.

Aligundulika kuwa na virusi hivyo katika maabara ya wizara ya Afya nchini Kenya.

Hata hivyo waziri huyo alisema, mgonjwa huyo ambaye ni mwanamke yuko katika hali njema na viwango vyake vya joto vimeshuka na kuwa vya kawaida.

Katika hatua nyingine Waziri huyo amewataka Wakenya kuwa watulivu na kuacha wasiwasi kwa kuwa serikali yao inaendelea kuimarisha mikakati ili kuhakikisha virusi vya Corona havisambai zaidi.

Waziri Kagwe aliwataka Wakenya kunawa mikono mara kwa mara, kutokaribiana zaidi na mtu mwingine anayekohoa ama kupiga chafya, watu wanaokohoa ama kupiga chafya wasalie majumbani mwao ama kutojichanganya na makundi ya watu.

Mengine ni watu kuziba pua na mdomo wanapokohoa kwa kutumia kitambaa ama tishu, . Mtu anayehisi joto ama tatizo la kupumua ametakiwa kusalia nyumbani.

Pia serikali ya Kenya imepiga marufuku mikutano ya aina yote ikiwemo ile ya umma ikiwemo ya kidini, michezo huku ikiwataka wanaotaka kwenda makanisani na misikitini kunawa mikono na sabuni kabla ya kuingia katika sehemu hizo.

Kenya pia imezuia michezo yote inayohusisha shule, wachukuzi wa umma na abiria kunawa mikono yao kabla ya kuingia katika magari hayo.

Pia Wakenya wamezuiwa kutoka nje ya nchi isipokuwa wale wenye umuhimu mkubwa wa kusafiri na hakuna mtu atakayeruhusiwa kuelekea katika mataifa yenye visa vingi vya ugonjwa huo.

DRC nako si shwari

Nako Jamhuri ya Kidemorasia ya Congo (DRC) kimeripotiwa kisa cha pili cha maambukizi ya virusi vya ugonjwa wa Corona.

Mwandishi wa Shirika la Utangazaji la Uingereza (BBC) mjini Kinshasa, mtu huyo anadaiwa ni raia wa Cameroon aliyewasili nchini humo kutoka Ufaransa.

Kwa sasa amelazwa hospitalini kwa matibabu huku Wizara ya Afya nchini humo ikitoa wito kwa raia kuzingatia usafi wakati wowote.

Mgonjwa huyo ni raia mwenye umri wa miaka 46 ambaye anaishi DR Congo na familia yake.

Alirudi nchini humo kutoka Ufaransa Mei 8, mwaka jana  na hakuonyesha dalili za virusi hivyo.

Mamlaka ya DR Congo inasema, kufikia sasa imewatambua watu 117 waliogusana na wagonjwa wawili wa virusi hivyo.

Taarifa hizo zinatokea siku moja baada ya madaktari nchini DR Congo kuamua kurudi kazini wakisitisha mgomo wa miezi miwili.

Ujerumani wachukua hatua

Maofisa mjini Berlin, nchini Ujerumani wametangaza kuwa mji huo utaanza kuzifunga hatua kwa hatua shule zote, chekechekea na vituo vya kulea watoto kuanzia wiki ijayo, huku usafiri wa umma ukipunguza ratiba zake.

Kituo cha televisheni cha N-Tv nchini Ujerumani kimetangaza taarifa hiyo baada ya kumnukuu Meya wa Berlin, Michael Mueller kuwa sekondari zitaanza kufungwa Jumatatu ijayo.

Wito umekuwa ukiongezeka nchini Ujerumani kuchukua hatua sawa na zile zilizochukuliwa na nchi jirani za Ulaya, kuzifunga shule kusaidia kupunguza kuenea kwa virusi vya Corona.

Lakini, kutokana na mfumo wa ugatuzi, ni serikali za majimbo pekee ndiyo zenye mamlaka ya kutoa matamko kama hayo.

Majimbo ya Saarland na Bavaria yametangaza kuzifunga shule zote kuanzia Jumatatu ijayo.

Jimbo la Bavaria kwa upande wake, linazifunga shule zote, chekechea na vituo vya kulea watoto hadi mwishoni mwa likizo ya sikukuu ya Pasaka, katikati ya Aprili ili  kukabiliana na janga la virusi vya Corona.

Kwa upande wake jimbo la Saarland limesema litazifunga shule zote katika kukabiliana na kuenea kwa virusi hivyo vya COVID-19.

Waziri Mkuu wa Saarland, Tobias Hans alisema kufungwa shule hizo ni hatua ya tahadhari kutokana na jimbo hilo kupakana na mkoa wa Grand Est ulioko Kaskazini Mashariki mwa Ufaransa.

Majimbo mengine matatu ya Ujerumani likiwemo la North Rhine Westphalia leo yanatarajia kuamua kuhusu kuzifunga shule zake.

Hayo yanajiri wakati ambapo Ijumaa, Ujerumani imetangaza kifo cha sita kutokana na virusi vya Corona, huku watu 2,000 wakiwa wameambukizwa nchini humo.

Ufaransa

Ufaransa nayo imesema itazifunga shule zote za msingi na sekondari pamoja na chekechea kuanzia Jumatatu ijayo.

Ubelgiji na Ureno nazo zimetangaza kuzifunga shule zake, huku shule na vyuo vikuu nchini Italia zikiendelea kufungwa nchi nzima kutokana na taifa hilo kuathirika zaidi na virusi vya Corona.

Nchi 15 Afrika shida

Aidha, nchi za Kenya, Ghana na Gabon zimetangaza visa vya kwanza vya Corona, hivyo kuifanya idadi jumla ya nchi zilizothibitisha kuhusu virusi hivyo barani Afrika kufikia 15.

Msemaji wa Shirika la Afya Duniani, WHO, Tarik Jasarevic amezitolea wito nchi zote duniani kushirikiana katika juhudi za kutafuta suluhisho la virusi vya Corona ambavyo vimetangazwa kuwa.

Mke wa Waziri Mkuu Canada

Sophie Grégoire Trudeau, mkewe Waziri Mkuu wa Canada, Justin Trudeau amepatikana na virusi vya ugonjwa hatari wa Covid-19, baada ya kufanyiwa vipimo.

Sophie ataendelea kusalia katika karantini kwa muda usiojulikana, ofisi ya Waziri Mkuu, Justin Trudeau imeeleza katika taarifa yake ya juzi jioni.

"Waziri Mkuu yuko katika afya njema na hana dalili zozote za maambukizi.

Hata hivyo, kwa tahadhari na kulingana na ushauri wa madaktari, atawekwa karantini kwa muda wa siku 14, "kimebaini chanzo hicho na kuongeza kuwa mkewe anaendelea," vizuri".

Justin Trudeau, 48, "kwa hivi sasa" hatafanyiwa vipimo na "ataendelea na majukumu yake kama Waziri Mkuu," ilisema ofisi yake na kuongeza kuwa Waziri Mkuu atalihutubia taifa leo Ijumaa.

Katika ujumbe kwa raia wa Canada, mkewe Justin Trudeau amewahakikishi raia kuwa anaendelea vizuri.

Ofisi ya Waziri Mkuu imetangaza mapema asubuhi kwamba alifanyiwa vipimo vya virusi vya ugonjwa wa Covid-19 kwa sababu alikuwa na dalili za homa tangu kurudi kutoka London. Chanzo TanzaniaDaima