Ratiba za NEC zamkwamisha Lissu kufika Mahakamani

 JANETH JOVIN

Mgombea wa urais wa Tanzania kupitia Chama cha Demokrasia na Maendeleo (Chadema), Tundu Lissu anayeabiliwa na kesi za uchochezi, ameshindwa kufika katika Mahakama ya Hakimu Mkazi Kisutu kwa sababu ya mchakato wa kurudisha fomu Tume ya Taifa ya Uchaguzi (NEC) kuchukua muda marefu.

Hayo yamedaiwa leo na Wakili wake Peter Kibatala wakati wa kesi zake za uchochezi zilivyoitwa kwa ajili ya kutajwa mahakamani hapo.

Wakili Kibatala amesema kwa mujibu wa ratiba iliyotolewa na NEC, Lissu na mgombea wake mwenza walitakiwa kurudisha fomu za kugombea urais na kupatiwa za uteuzi saa 6 mchana kisha aanze safari za kurejea Dar es Salaam kuhudhuria kesi zake.

Amesema kwa bahati mbaya mpaka saa 2:30 usiku wagombea hao walikuwa awajatoka katika ofisi za tume hivyo kusababisha ratiba zake za usafiri kurejea Dar es Salaam kuharibika.

"Hivyo naiomba mahakama iridhie kuahirisha kesi hii na kupanga tarehe nyingine ambayo naamini mshtakiwa atakuwepo mahakamani," amedai Kibatala

Baada ya Kibatala kueleza hayo, Wakili wa Serikali Mkuu Renatus Mkude amedai kuwa kwa mazingira hayo yaliyoelezwa na wakili wa utetezi hawana pingamizi hivyo rai yao shauri hilo liahirishwe hadi tarehe nyingine.

Hakimu Mkazi Mwandamizi Kassian Matembele ameahirisha kesi hiyo hadi Septemba 24, mwaka huu.

Katika kesi  hiyo namba 123 ya mwaka 2017, Lissu anadaiwa kutoa maeneno ya uchochezi wakati wa kampeni za uchaguzi mdogo wa jimbo la Deman, Zanzibar, Januari 11, 2017, akiwa eneo la Kibunju Maungani, Wilaya ya Magharibi B, mkoni Mjini Magharibi.

Inadaiwa siku hiyo Lissu alisema maneno: “Tangu mwaka 1964 Tanganyika ndiyo inayoamua nani atawale Zanzibar...Tangu mwaka 1964 Zanzibar inakaliwa kijeshi na Tanganyika, nani anayebisha… Tangu mwaka 1995 ikifika uchaguzi askari wa Tanganyika wanahamia Zanzibar ili kuja kuhakikisha kuwa vibaraka wao wa Zanzibar hawaondoki na wananchi wa Zanzibar mnapigwa, mnateswa,mnauawa, kwa sababu ya ukoloni wa Tanganyika kwa Zanzibar.”

Pia inadaiwa katika tarehe hiyo Lissu alitamka kuwa "Marehemu Karume alipoanza kushtuka mwaka 71, 72 akauawa…, itakapofika tarehe 15 mwezi wa Kwanza mnaadhimisha miaka 53 ya kukaliwa kijeshi na Tanganyika.”

”Jumbe aliondolewa Dodoma, na Ally Hassan Mwinyi alipewa urais wa Zanzibar Dodoma, na  aliyempa ni Nyerere na si Wazanzibar… Marais wa Zanzibar wote ni made in Tanganyika..”

 “Zanzibar wanatawaliwa na Tanganyika kwa kivuli cha Tanzania, Tanzania ni  Tanganyika …, Tanganyika ni kivuli tu cha kuikalia Zanzibar , cha kuigeuza Zanzibar koloni na makoloni huwa yanawanyanyasa yanaowanyonya kisiasa, kiuchumi na kuyakandamiza kijeshi…

“Mmetawaliwa na Tanganyika kisiasa, miaka yote hii… Mohamed Shein hana lolote ni kibaraka tu siku watawala wakisema hatufai ataondolewa tu kama alivyoondolewa Aboud Jumbe.”

Katika kesi namba 236/2017 iliyokuwa mbele ya Hakimu Mkazi Mwandamizi, Augustina Mmbando, Lissu anadaiwa 17, 2017 akiwa eneo la Ufipa, Wilaya ya Kinondoni ndani ya Jiji la  Dar es Salaam alitoa maneno ya chuki kwamba  

"Serikali ya awamu ya tano chini ya Rais John Pombe Magufuli ni ya kibaguzi wa kifamilia, kikabila, kikanda na kidini.Vibali vya kazi work permit vinavyotolewa kwa wamishenari wa kikatoliki tu huku mashehebu mengine yakielezwa kupanga foleni uhamiaji,

"Viongozi wakuu wa Serikali wanachaguliwa kutoka kwenye familia,kabila na ukanda...Acheni woga pazeni sauti...kila mmoja wetu...tukawaambie wale ambao bado wanampa msaada wa pesa Magufuli na Serikali yake kama tulivyoambiwa wakati wa Serikali ya Makaburu, hii Serikali isusiwe na jumuiya ya kimataifa, isusiwe kisiasa, kiuchumi na kidiplomasia kwa sababu ya utawala huuwa kibaguzi...yeye ni dikteta uchwara"  maneno ambayo yalikuwa na lengo la kusababisha chuki.