TOAM, TABIO kukutanisha wadau 300 wa kilimo

Mkurugenzi Mtendaji wa  Shirika Mwavuli Linalosimamia Shughuli za Kilimo Hai Tanzania (TOAM), Bakari Mongo akizungumza na waandishi wa habari kuhusu kongamano la wadau wa kilimo hai linalotarajiwa kufanyika Novemba 23/2020 katika Chuo Kikuu cha Dar es Salaam (UDSM). Kulia ni Mratibu wa Shirika lisilo la Kiserikali linalojishughulisha na Utunzaji wa Bioanuai Tanzania (TABIO), Abdallah Mkindi. (Picha na Suleiman Msuya)

Mratibu wa  Shirika lisilo la Kiserikali linalojishughulisha na Utunzaji wa Bioanuai Tanzania (TABIO), Abdallah Mkindi akifafanua kuhusu kongamano la kilimo linatarajiwa kufanyika Chuo Kikuu cha Dar es Salaam (UDSM), kushoto Mkurugenzi Mtendaji wa  Shirika Mwavuli Linalosimamia Shughuli za Kilimo Hai Tanzania (TOAM), Bakari Mongo.

 

NA SULEIMAN MSUYA

ZAIDI ya wadau wa kilimo 300 kutoka nchi tano wanatarajiwa kukutana Novemba 23/2020 katika mjadala wa wazi juu ya kuelekea kwenye uhuru wa mbegu na utunzaji wa bioanuai ya Tanzania.

Kongamano hilo la siku moja limeandaliwa na Shirika lisilo la Kiserikali linalojishughulisha na Utunzaji wa Bioanuai Tanzania (TABIO) na Shirika Mwavuli Linalosimamia Shughuli za Kilimo Hai Tanzania (TOAM), 

Hayo yamesemwa na Mkurugenzi Mtendaji Mkuu wa TOAM, Bakari Mongo wakati akizungumza na waandishi wa habari jana jijini Dar es Salaam.

Mongo amesema kongamano hilo ambalo linakutanisha wadau 300 kutoka nchi za Tanzania, Ivory Cost, Bokinafaso, Uswisi na Afrika Kusini limelenga kuongeza uelewa wa umma kuhusu faida za kutumia mbegu asili kwenye kilimo.

Amesema kongamano hilo litafanyika katika ukumbi wa mikutano wa Maktaba ya Chuo Kikuu cha Dar es Salaam hivyo kuwataka wadau mbalimbali katika sekta ya kilimo kujitokeza kwa wingi ili kujadili kwa pamoja.

"Zaidi ya wadau 300 wa kilimo kutoka sekta binafsi, serikali, asasi za kiraia, washiriki wa maendeleo, wakulima, wanafunzi kutoka vyuo vya elimu ya juu na waandishi wa habari watakutana na kujadili kuhusu hatima ya mbegu asili na mkulima wa Tanzania,"amesema.

Amesema mkakati wa TOAM na TABIO ni kuhakikisha mkulima anayetumia mbegu asili anathaminiwa na kutambulika na dhana ya kupigia chepuo mbegu zilizoongezwa vinasaba zisiwepo kwani hazina faida kwa mkulima na mlaji.

Mongo amesema ni imani yake elimu na mjadala huo vitafungua kurasa mpya kwa jamii hasa mkulima ambaye wakati mwingine anaingia kwenye mtihani mgumu wa nini afuate mbegu asili au zenye vinasaba ambazo zinadaiwa kuwa na athari za kiuchumi.

Mratibu wa TABIO Tanzania, Abdallah Mkindi amesema, wameamua kuandaa kongamano hilo kutokana na ukweli kuwa mbegu ni kiunganishi cha kwanza katika mnyororo wa chakula hivyo ni jukumu lao kizilinda na kuzirithisha kwa vizazi vijavyo.

"Uzalishaji wa mbegu na kubadilishana miongoni mwa wakulima imekuwa msingi wa kutunza bioanuai ya kilimo na uhuru wetu wa chakula," amesema.

Mkindi amesema mbegu asili ndizo zinaweza kumkomboa mkulima NA wananchi hivyo ni wakati muafaka kwa nguvu nyingi kuelekezwa huko na kuachana na mitazamo ya kufikiria mbegu zenye vunasaba.

Amesema dhana ya kuwa mbegu hizo zinaongeza uzalishaji haina ukweli hivyo jamii inapaswa kusisitizwa kutumia mbegu asili kwani ndio suluhu ya uhaba wa chakula duniani.